މަޝްހޫރު އެކްޓަރ ޝާހްރުކް ޚާންގެ އަންހެން ދަރި ސުހާނާ ޚާން ފުރަތަމަ ފެނިގެންދާނީ މަޝްހޫރު މެގަޒިނެއްގެ ކަވަރ އިން ކަމަށް އޭނާގެ މަންމަ ގޯރީ ޚާން ބުނެފިއެވެ.
އިންޑިއާގެ ނޫހެއް ކަމަށްވާ ޑީއެންއޭއިންޑިއާއަށް ދީފައިވާ އިންޓަވިއުއެއްގައި ގޯރީ ބުނެފައި ވަނީ އޭނާގެ ދަރިފުޅު ސުހާނާ ވަރަށް އަވަހަށް މަޝްހޫރު މެގަޒިންގެ ކަވަރ އިން ފެނިގެން ދާނެ ކަމަށެވެ. އެހެން ނަމަވެސް އެއީ ކޮން މެގަޒިނެއް ކަމެއް ގޯރީ ނުބުނެއެވެ.
ސުހާނާ 17، މެގަޒިންއަކުން ފެންނާނެ ކަމަށް ގޯރީ ބުނެފައި ވާއިރު މީގެ ކުރިން ޝާހު ދީފައިވާ އިންޓަވިއުއެއްގައި ބުނެފައި ވަނީ ސުހާނާ އެކްޓުކުރުމަށް ޝައުގުވެރިކަން ފާޅުކޮށްފައިވާ ކަމަށެވެ. އެކްޓްކުރަން ޝައުގުވެރިކަން ފާޅުކުރުމުން އޭނާ އެކަމަށް ހުރަހެއް ނާޅާނެ ކަމަށާއި ސުހާނާ ބޭނުން ދާއިރާއަކުން ކުރިއަށް ދާން ފުރުސަތު އޮންނާނެ ކަމަށް ޝާހު ވަނީ ބުނެފައެވެ. ޝާހު ބުނީ އޭނާގެ ދަރިފުޅު ރަނގަޅަށް ކިޔަވައި ނިމުމުން އެކަން ސުހާނާއަށް އޮންނާނެ ކަމަށާއި އޭނާގެ ސަޕޯޓް ސުހާނާއަށް ލިބޭނެ ކަމަށެވެ.
ސުހާނާ ބޮލީވުޑަށް ތައާރަފް ވާނެ ކަމަށް ބުނެ އެންމެ ފުރަތަމަ އަޑުތައް ފެތުރުނީ މިދިޔަ އަހަރުގެ ތެރޭގައެވެ. ޝާހުރުކް ޚާންގެ ގާތް މީހަކު އިންޑިއާގެ ބައެއް ނޫސްތަކުގައި އެކަމާ ބެހޭ ގޮތުން ވާހަކަ ދައްކަމުން ބުނެފައި ވަނީ އަންނަ އަހަރު ސުހާނާ ބޮލީވުޑުން ފެނިގެންދާނެ ކަމަށެވެ. އެހެންކަމުން އޭގެ ކުރިން ހަދަންޖެހޭ ޓްރެއިނިންތައް ސުހާނާ ހަދަމުންދާ ކަމަށް އޭނާ ބުންޏެވެ. އަދި ސުހާނާ ފިލްމީ ދުނިޔެއަށް ވެއްދުމުގެ ތައްޔާރީތައް ޝާހްރުކް ވަނީ ފަށާފައި ކަމަށާއި ސުހާނާ ތައާރަފްވާ ފިލްމު އުފައްދަނީ ކަރަން ޖޯހަރް ކަމަށް ވެސް މީގެ ކުރިން ވަނީ އަޑުފެތުރިފައެވެ.
