މިއަހަރުގެ މާރޗް 8-10 އަކަށް ނެޝެނަލް އާރޓް ގެލަރީގައި ބޭއްވުނު މޯލްޑިވްސް ލިވިންގް އެކްސްޕޯ ވަރަށް ކާމިޔާބު ކަމަށް އެ އިވެންޓް އިންތިޒާމް ކުރި ހައިރައިޒް ކުންފުނީގެ ފަރާތުން ބުނެފިއެވެ.
ހައިރައިޒް ކުންފުނީގެ ސޭލްސް އެންޑް މާރކެޓިންގް މެނޭޖަރ މަރިޔަމް މާއިޝާ ވިދާޅުވީ މިފަހަރުގެ އެކްސްޕޯ ނިމިގެންދިޔައީ ދެހާހަށް ވުރެ ގިނަ ބައިވެރިންނާއެކު ކަމަށާއި މިއީ ފާއިތުވި ހަ އަހަރު ދުވަހާ އަޅާ ބަލާއިރު ބޮޑު ކުރިއެރުމެއް ކަމަށެވެ.
މާއިޝާ އިތުރަށް ވިދާޅުވީ މިފަހަރު އެކްސްޕޯގައި ރާއްޖެ އާއި ރާއްޖޭ އިން ބޭރުގެ 20 އަށް ވުރެ ގިނަ ފަރާތްތަކުން ބައިވެރިވެފައިވާ ކަމަށެވެ. އަދި ހައިރައިޒް ކުންފުނީގެ އަމާޒަކީ މި އަންނަ އަހަރުގެ އެކްސްޕޯ ވެސް ގިނަ ފަރާތްތަކާއެކު ބޮޑުކޮށް ބޭއްވުން ކަމަށް އޭނާ ވިދާޅުވިއެވެ.
މޯލްޑިވްސް ލިވިންގް އެކްސްޕޯ އެންޑޯސް ކޮށްފައިވަނީ މޯލްޑިވްސް ނެޝެނަލް ޗެމްބާސް އޮފް ކޮމާސް އިންނެވެ.
މި އިވެންޓްގެ މެއިން ސްޕޮންސަރ އަކަށް ކޮލަންބޯ ސިޓީ ސެންޓަރ ހަމަޖައްސާފައިވާއިރު ކޯ ސްޕޮންސަރުންނަކީ އަލްޓަރަޔާ އަދި ކޮރަލް ބޮލިވާޑްއެވެ.
ކޮލަންބޯ ސިޓީ ސެންޓަރުގެ ޖެނެރަލް މެނޭޖަރ ނިރުޕާ ޕެއިރިސް ވިދާޅުވީ ސްރީލަންކާގެ ރައްޔިތުންގެ އިތުރުން ދިވެހިން ވެސް ސްރީލަންކާގެ ޕްރޮޕަޓީސްތަކުގައި އިންވެސްޓް ކުރުމުގެ ޝައުގުވެރިކަން ފާޅުކޮށްފައިވާ ކަމަށާއި މި އެކްސްޕޯގައި ބައިވެރިވުމުގެ މައިގަނޑު މަޤްސަދަކީ ކޮލަންބޯ ސިޓީ ސެންޓަރ އިތުރަށް އިޝްތިހާރު ކުރުން ކަމަށެވެ.
މޯލްޑިވްސް ލިވިންގް އެކްސްޕޯގައި ގެދޮރާ ބެހޭ މުހިންމު މައުލޫމާތުތަކުގެ އިތުރުން ފަރުނީޗަރުތަކާއި ލިވިންގް ލައިފް ސްޓައިލްގެ އިލެކްޓްރޯނިކްސް ސާމާނުތަކަށް ވެސް ބޭނުންވާ ގިނަ މައުލޫމާތުތަކެއް ފޯރުކޮށްދީފައިވާ ކަމަށް ހައިރައިޒް ކުންފުނިން ބުންޏެވެ.
ކޮރަލް ބޮލިވާޑްގެ އެސިސްޓަންޓް މެނޭޖަރ ސޭލްސް އެންޑް މާރކެޓިންގް އައިޝަތު ގާހިރު ވިދާޅުވީ މި އެކްސްޕޯގެ ސަބަބުން އެ ކުންފުނި ވަރަށް ގިނަ ބަޔަކަށް އެނގިގެން ހިނގައްޖެ ކަމަށާއި އެކްސްޕޯ އަށް ޒިޔާރަތް ކުރާ މީހުންގެ ވަރަށް ބޮޑު ތަރުހީބެއް ލިބެމުންދާ ކަމަށެވެ. އެ ކުންފުނިން އަންނަނީ ރަސްފަންނު ބީޗް ކައިރީގައި ޓަވަރުތަކެއް ތަރައްގީ ކުރަމުންނެވެ.
އެކްސްޕޯގެ ނިންމުމުގެ ރަސްމިއްޔާތުގައި ޒިޔާރަތް ކުރި ފަރާތްތަކަށް ވަރަށް ހާއްސަ އިނާމުތަކެއް ވަނީ ދީފައެވެ.
އެފްއެންޑްބީ ޝޯއެއް ނެޝެނަލް އާރޓް ގެލަރީގައި މިއަހަރުގެ މެއި މަހު ބޭއްވުމަށް ނިންމާފައިވާ ކަމަށް ހައިރައިޒް ކުންފުނިން ވަނީ ބުނެފައެވެ.
