މޮސްކޯ އިންޓަނޭޝަނަލް ޓްރެވަލް އެންޑް ޓުއަރިޒަމް (އެމްއައިޓީޓީ) ފެއަރ ފަށައިފިއެވެ.
މި ފެއަރ އަކީ ރަޝިއާގެ މޮސްކޯގައި ބާއްވާ އެންމެ ބޮޑު ޓޫރިޒަމް ފެއަރ އެވެ. މި ފެއަރ މިއަދު ފަށާފައިވާއިރު ފެއަރ ކުރިއަށްދާނީ މި މަހުގެ 15 ވަނަ ދުވަހާއި ހަމައަށެވެ.
މި ފެއަރ ގައި ރާއްޖޭގެ 28 ކުންފުންޏަކުން 55 މަންދޫބުން ބައިވެރިވެފައިވާއިރު އެމްއެމްޕީއާރްސީ އިންވެސް ވަނީ ފެއަރ ގައި ބައިވެރިވެފައެވެ.
އެމްއައިޓީޓީ ފެއަރ ފާހަގަކޮށްލެވިގެންދަނީ ރަޝިއާގައި ބާއްވާ އެންމެ ބޮޑު އަދި އެންމެ ގިނަ ބަޔަކު ޒިޔާރަތް ކުރާ ފެއަރގެ ގޮތުގައެވެ.
ކޮންމެ އަހަރަކު އެއްފަހަރު ބާއްވާ މި ފެއަރ އަކީ ދުނިޔޭގެ އެންމެ ބޮޑެތި ޓްރެވަލް ފެއަރ ތަކުގެ ލިސްޓުގައި ހިމެނޭ ފެއަރ އެކެވެ.
މިއީ އެމްއައިޓީޓީ ފެއަރ ބާއްވާ 25 ވަނަ ފަހަރެވެ.
