ސީރިޔާގެ ފައުޖުތަކުން އިރުމަތީ ޣޫތާގެ އެންމެ ބޮޑު އަވަށް ހިފައި އިދިކޮޅު ހަނގުރާމަވެރިންގެ ބާރުގަދަ ތިން ސަރަހައްދެއް ސަރުކާރު ސިފައިންގެ ކޮންޓްރޯލްގެ ދަށަށް ގެންގޮސްފައިވާކަމަށް މޮނިޓަރިންގ ގްރޫޕަކުން އަލަ ޖަޒީރާގައި ބުނެފިއެވެ.

ސީރިޔަން އޮބްޒަވޭޓަރީ ފޮރ ހިއުމަން ރައިޓްސްއިން ހޮނިހިރު ދުވަހު ބުނީ ސަރުކާރުގެ ފައުޖުތަކުން ޣޫތާގެ މަސްރަބާ ޓައުން ހިފާފައިވާކަމަށެވެ. އެ ވެރިރަށް ދިމިޝްގުގެ އިރުން 10 ކިލޯމީޓަރު ދުރުމިނުގައި އޮންނަ އެ އަވަށް ހިފާފައިވާއިރު ވަށައިގެންވާ ސަރަހައްދުތަކުންވެސް ސަރުކާރުގެ ސިފައިން ކުރިއަރަމުން އަންނަކަމަށް އެ ޖަމާއަތުން ބުނެއެވެ.

ސީރިޔާގެ ދައުލަތުގެ ޓީވީއިން ބުނީ އިރުމަތީ ޣޫތާގެ މެދުތެރޭގައި ސީރިޔާގެ އަސްކަރިއްޔާގެ ބާރު ގަދަވަމުންދާކަމަށެވެ. މީގެ އިތުރުން އިދިކޮޅު ހަނގުރާމަވެރިންވެސްވަނީ އެ ޓައުނާއި ގުޅިފައިވާ މަގު އަސްކަރިއްޔާއިން ކޮންޓްރޯލް ކޮށްފައިވާކަމަށެވެ.

މިދިޔަ ފެބްރުއަރީ މަހުގެ 18 ވަނަ ދުވަހު ޣޫތާގެ ހަމަލާތައް ފަށާފައިވާއިރު މިހާތަނަށް 1،002 މީހުން މަރާލާފައިވާކަމަށް ސީރިޔަން އޮބްޒަރވޭޓަރީ ފޮރ ހިއުމަން ރައިޓްސްއިން ބުނެފިއެވެ.

މީގެ ތެރޭގައި 215 ކުޑަކުދިންނާއި 145 އަންހެނުން ހިމެނެއެވެ.

ސީރިއަން އެމެރިކަން މެޑިކަލް ސޮސައިޓީއިން އަލް ޖަޒީރާގައި ބުނެފައިވަނީ ހުކުރު ދުވަހުގެ ހަމަލާތަކުގައި އެކަނިވެސް 49 މީހުން މަރުވެފައިވާއިރު އޭގެ ތެރޭގައި 14 އަންހެނުންނާއި 10 ކުޑަކުދިން ހިމެނޭކަމަށެވެ.

އިތުރު 200 މީހުން ޒަޚަމްވެފައިވާކަމަށް އެ ޖަމާއަތުން ބުނެއެވެ.

ސީރިއާގެ އިރުމަތީ ޣޫތާގެ ހާލަތާއިމެދު ބައިނަލްއަޤްވާމީ މުޖުތަމައު އިން ކަންބޮޑުވުން ފާޅު ކުރަމުންދާއިރު، ކުރިމަތިލުންތަކުގެ ސަބަބުން ޣޫތާގައި ހާލުގައި ޖެހިފައިވާ އާއްމުންނަށް އެހީތެރިކަން ފޯރުކޮށްދިނުމަށް މަސައްކަތް ކުރާ ފަރާތްތަކުގެ މަސައްކަތް ކުރިއަށް ގެންދިޔުމަށް ހުރަސްތަކާއި ކުރިމަތިލާން ވަނީ ޖެހިފައެވެ.

ހަތަރު ލައްކަ އެއްހާ މީހުން ދިރިއުޅޭ އިރުމަތީ ޣޫތާގެ އާބާދީގެ ބޮޑު ބަޔަކީ ސީރިއާގެ ދާޚިލީ ހަނގުރާމައިގެ ސަބަބުން އެހެން ސަރަހައްދުތައް ދޫކޮށް އެސަހަރަށް ހިޖުރަކޮށްފައިވާ ފަރާތްތަކެވެ.

ސީރިއާގެ ރައީސް ބައްޝާރުލް އަސަދުގެ ސަރުކާރާއި ދެކޮޅު ހަނގުރާމަވެރި ގްރޫޕްތަކުން ކޮންޓްރޯލް ކުރާ އިރުމަތީ ޣޫތާ އަކީ ވެރިރަށް ދިމިޝްޤުގެ ރަށް ބޭރުގައި އޮންނަ ސަހަރެކެވެ. ގާތްގަނޑަކަށް ހަތަރު ލައްކައެއްހާ މީހުން ދިރިއުޅޭ އިރުމަތީ ޣޫތާ އިދިކޮޅު ހަނގުރާމަވެރިންގެ ބާރުގެ ދަށަށް ދިޔުމާއެކު، ސީރިއާގެ ސިފައިން ވަނީ 2013 ވަނަ އަހަރުން ފެށިގެން އެސަހަރު ވަށާލައި، ހިސާރުކޮށްފައެވެ. ބައްޝާރުގެ ފައުޖުތަކުގެ ހަނގުރާމަވެރިން އިރުމަތީ ޣޫތާ އަށް ވަދެވެން އޮންނަ މަގުތައް ބަންދުކުރުމާއި ގުޅިގެން އެސަހަރުގެ ތެރެއަށް ކާބޯތަކެތި ފޯރުކޮށްދިނުމުގައި ދަތިތަކާއި ކުރިމަތިލާން ޖެހިފައިވާއިރު، އެކަމާއި ގުޅިގެން އެސަރަހައްދުގެ ތަކެތީގެ އަގު ބޮޑުވެ، އިންފްލޭޝަން ރޭޓް ވަނީ އިންތިހާއަށް މައްޗަށް ގޮސްފައެވެ.