ބްލޭޒަން އިންކް އިން "މޯލްޑިވްސް ބިޒްނަސް ރިވިއު (އެމްބީއާރް)" ގެ ނަމުގައި ދިވެހިރާއްޖޭގެ އިޤްތިސާދުގެ ހުރިހާ ދާއިރާތަކަށް ޚާއްސަކޮށްގެން އޮންލައިން މަޖައްލާއެއް ނެރެފިއެވެ.
މި އޮންލައިން މަޖައްލާ ނެރެދެއްވީ މާރޗް 7 ވަނަ ދުވަހުގެރޭ ބޭއްވި ފޭސްބުކް ލައިވް އިވެންޓެއްގައި މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ގަވަރުނަރު އަހްމަދު ނަސީރެވެ.
މި އިވެންޓުގައި ވާހަކަ ދައްކަވަމުން ނަސީރު ވަނީ ދިވެހިރާއްޖޭގެ އިޤްތިސާދު ކުރިއެރުވުމަށް ވިޔަފާރީއަށް ހާއްސަ ކުރެވިފައިވާ މިފަދަ މަންސާއެއްގެ މުހިންމުކަން ފާހަގަ ކުރައްވާފައެވެ. އަދި އެމްބީއާރް އަކީ ރާއްޖޭގައި އިގްތިސާދާއި ގުޅޭ މައުލޫމާތު ފޯރުކޮށްދިނުމުގައި މުހިއްމު ދައުރެއް އަދާކުރެވޭނެ މަޖައްލާއެއް ކަމަށް ވެސް ނަސީރު ފާހަގަކުރެއްވިއެވެ.
އެމްބީއާރްގެ މަޤްސަދަކީ ދިވެހިރާއްޖޭގެ އިޤްތިސާދާއި ގުޅުންހުރި ހުރިހާ ދާއިރާއެއްގެ މައުލޫމާތާއި ތަފާސްހިސާބު، އިޤްތިސާދާއި ގުޅުން ހުރި ހުރިހާ ފަރާތްތަކަށް ހަމަހަމަ ގޮތެއްގައި ފޯރު ކޮށްދިނުމެވެ. އަދި އާ ވިސްނުމަކާއިއެކު ދިވެހިރާއްޖޭގެ އިޤްތިސާދީ ހާލަތު ގެނެސްދީ، ތަފްސީލީ ދިރާސާތަކެއް ކިޔުންތެރިންނާއި ހަމައަށް ފޯރުކޮށްދިނުމެވެ.
ބްލޭޒަން އިން އިތުރަށް ބުނީ ޗާފްކުރެވިގެން އަހަރަކު 2 ފަހަރު ނެރޭ މަޖައްލާއަކާއި މޯބައިލް އެޕްލިކޭޝަންއަކުން އެމްބީއާރް ތަޖްރިބާކޮށްލުމުގެ ފުރުސަތު މި އަހަރުގެ މެދު ތެރޭގައި ހުޅުވާލާނެ ކަމަށެވެ.
ބްލޭޒަން އިންކްއަކީ، މާކެޓިންގ، ފަބްލިކް ރިލޭޝަން އަދި ވިޔަފާރި ހިންގުމަށް ބޭނުންވާ ހުރިހާ ހިދުމަތެއް ފޯރުކޮށްދޭ ކުންފުންޏެކެވެ.
