ސޮލެރަލް އިންޝުއަރަންސް ކުންފުނީގެ ފަރާތުން ގޭބީސީ އިންޝުއަރެންސްގެ ހިދުމަތް ފަށައިފިއެވެ.
އެ ކުންފުނީގެ ޑެޕިއުޓީ ސީއީއޯ ހުސެއިން ރަޒީން ވިދާޅުވީ މި އިންޝުއަރެންސް ސްކީމްގައި ކަވަރު ކުރާނީ އެޕާޓްމަންޓުތަކުގައި ދިރިއުޅޭ ފަރާތްތަކުގެ މުދާތައް ކަމަށާއި އިންޝުއަރެންސް ޕޮލިސީ ހަމަޖެހިފައިވަނީ ބެޑްރޫމްތަކަށް ބަހާލައިގެން ކަމަށެވެ.
ރަޒީން އިތުރަށް ވިދާޅުވީ މިކަހަލަ އިންޝުއަރެންސް ސްކީމެއް ތައާރަފު ކުރުމުގެ މައިގަނޑު މަގްސަދަކީ ރައްޔިތުންނަށް އެމީހުންގެ މުދާތައް ހެޔޮ އަގެއްގައި އިންޝުއަރ ކުރުމުގެ ފުރަސަތު ހުޅުވާލުމަށް ކަމަށެވެ.
އެގޮތުން އިންޝުއަރެންސް ޕޮލިސީގައި އެއްބެޑްރޫމް އެޕާޓްމަންޓް ރަޖިސްޓްރީ ކުރަން ބޭނުންވާ ކަމުގައިވާނަމަ ދައްކަން ޖެހެނީ 1500 ރުފިޔާއެވެ. ދެ ބެޑްރޫމް އެޕާޓްމަންޓްއަކަށް 2000 ރުފިޔާ ނަގާއިރު ތިން ބެޑްރޫމް އެޕާޓްމަންޓްއަކަށް ނަގަނީ 2500 ރުފިޔާއެވެ. މި ރަޖިސްޓްރޭޝަން ފީ އަކީ ކޮންމެ އަހަރަކަށް ދައްކަން ޖެހޭ އަދަދެވެ.
މީގެ އިތުރުން މި އިންޝުއަރެންސް ސްކީމްގައި އެ ގެއެއްގެ ދިރިއުޅޭ ފަރާތެއްގެ މޮޓޯ ސައިކަލް ނުވަތަ ކާރު އިންޝުއަރ ކުރުމުގެ ފުރުސަތު ހިލޭ އޮންނާނެ ކަމަށް ވެސް އެ ކުންފުނިން ބުންޏެވެ.
ކުންފުނިން ފޯރުކޮށްދޭ އިންޝުއަރަންސްއާ ބެހޭ އިތުރު މައުލޫމާތު ހޯދުމަށް 1413 އަށް ގުޅުމަށް އިންޝުއަރެންސް ކުންފުނިން ވަނީ އެދިފައެވެ.
މި އިންޝުއަރެންސް ސްކީމް ސޮލެރަލްގެ އައްޑޫ ބްރާންޗުގައި ތައާރަފުކުރެވިފައިވާއިރު އެ ކުންފުނިން އިތުރަށް ރަށްތަކުގައި މި ސްކީމް ތައާރަފުކުރުމުގެ މަސައްކަތް ކުރާނެ ކަމަށް މައުލޫމާތުދެއެވެ.
މިފަދަ އިންޝުއަރެންސް ސްކީމެއް ރާއްޖޭގައި އަދި މިހާތަނަށް ތައާރަފުކޮށްފައިނުވާ ކަމަށް ވެސް އެ ކުންފުނިން ބުނެއެވެ.
