ކެޕިޓަލް މާރކެޓް ޑިވަލޮޕްމަންޓް އޮތޯރިޓީ (ސީއެމްޑީއޭ) އާއި މޯލްޑިވްސް ސްޓޮކް އެކްސޭޖެންޖް (އެމްއެސްއީ) އަދި ކޯޕަރޭޓް މޯލްޑިވްސް ގުޅިގެން ބެސްޓް ކޯޕަރޭޓް ގަވަރނަންސް އެފަރޓްސް އެވޯޑް ތައާރަފުކޮށްފިއެވެ.
މި އެވޯޑް ތައާރަފުކޮށްފައިވަނީ ފެބްރުއަރީ 22 ވަނަ ދުވަހުގެ ރޭ ބަނޑޮސް އައިލެންޑް ރިސޯޓުގައި ބޭއްވި "ގޯލްޑް 100 ގާލާ 2018" އެވޯޑް ހަފްލާގައެވެ.
މި އެވޯޑް ތައާރަފުކުރުމުގެ މަޤްސަދަކީ ޕްރައިވެޓް ސެކްޓަރ ކުންފުނިތަކުގެ މެދުގައި ކޯޕަރޭޓް ގަވަރނަންސް ޕްރޮމޯޓް ކުރުމާއި ކޯޕަރޭޓް ގަވަރނަންސްގެ އުސޫލުތަކާއި އެއްގޮތަށް ކުންފުނިތަކުގެ ހިންގުން ބައްޓަންކޮށް ހަރުދަނާ ކުރުމަށް ކުންފުނިތަކުން ކުރާ މަސައްކަތް ދެނެގަތުމާއި އެ މަސައްކަތްތަކަށް ތަރުހީބު ދިނުމާއި މަސައްކަތުގެ އަގު ވަޒަންކުރުމެވެ.
ސީއެމްޑީއޭ އިން ބުނީ އެ އޮތޯރިޓީން ކުރާ އުންމީދަކީ ޕްރައިވެޓް ސެކްޓަރތަކުގައި ހިމެނޭ ކުންފުނިތަކުން މި އެވޯޑަށް އަމާޒުކޮށްގެން ފާހަގަކޮށްލެވޭ މަސައްކަތްތަކެއް ކުރުމާއި ކުންފުނިތަކުގެ މައްޗަށް އިންވެސްޓަރުންނާއި ސްޓޭކް ހޯލްޑަރުންގެ އިތުބާރު އިތުރުކުރެވި، ރާއްޖޭގެ ވިޔަފާރީތައް ކުރިއެރުވުމަށް ބޭނުންވާ ފައިސާ ފަސޭހައިން ހޯދޭނެ މަގުތައް ފަހިވެ، ބައިނަލްއަގްވާމީ ފެންވަރުގައިވެސް ފާހަގަކޮށްލެވޭ ކުންފުނިތަކަކަށް ވެގެންދިޔުމެވެ.
