ކެޕިޓަލް މާރކެޓް ޑިވަލޮޕްމަންޓް އޮތޯރިޓީ އިން ރިވިއުގެ ނަމުގައި އަންގާރަ ދުވަހު ފޮތެއް ނެރެފިއެވެ.
މި ފޮތް ނެރެދެއްވީ ދިވެހިރާއްޖޭގެ އިސްލާމިކް ޔުނިވަރސިޓީގެ ޗާންސަލަރ ޑރ. މުހައްމަދު ޝަހީމް އަލީ ސައީދުއެވެ.
މި ފޮތަކީ ކެޕިޓަލް މާރެކެޓާ ގުޅޭ ގޮތުން އާންމުން އަހުލުވެރި ކުރުމުގެ މަޤްސަދުގައި ކޮންމެ އަހަރަކު ނެރުމަށް ރާވާފައިވާ ފޮތެއް ކަމަށް ސީއެމްޑީއޭ އިން ބުންޏެވެ. މި ނެރުނު ފޮތުގައި ސީއެމްޑީއޭ މެދުވެރިކޮށް ވިޔަފާރިތަކަށް ބޭނުންވާ ފައިސާ ހޯދޭނެ ވަސީލަތްތަކާއި މާލީ ހިސާބުތައް ދިރާސާ ކުރާނެ ގޮތުގެ އިތުރުން އިސްލާމިކް ކެޕިޓަލް މާރކެޓާ ގުޅޭ ގިނަ މައުލޫމާތުތައް ހިމެނެއެވެ.
މީގެ އިތުރުން ހިއްސާ، ބޮންޑު ސުކޫކް ފަދަ ވަސީލަތްތަކުގެ މައުލޫމާތާއި ފަންޑުތަކުގައި އިންވެސްޓް ކުރުމުގެ މައުލޫމާތު ވެސް ފޮތުގައި ހިމެނެއެވެ.
މި ރަސްމިއްޔާތުގައި ވާހަކަ ދައްކަވަމުން ސީއެމްޑީއޭގެ ސީއީއޯ ނާދިޔާ ހަސަން ވިދާޅުވީ ދިވެހިރާއްޖޭގެ އިޤްތިސާދަށް ފައިދާކުރަނިވި ކެޕިޓަލް މާރކެޓެއް ގާއިމްކުރުމާއި ކެޕިޓަލް މާރކެޓް ތަރައްޤީކުރުމަށްޓަކައި އާންމު ރައްޔިތުންގެ މާލީ ހޭލުންތެރިކަން އިތުރު ކުރުމަކީ މުހިންމު ކަމެއް ކަމަށެވެ.
ސީއެމްޑީއޭ ކުންފުނިން ގާއިމްކޮށްފައި ވަނީ 2006 ވަނަ އަހަރުގައި މިނިވަން މުއައްސަސާއެއްގެ ގޮތަށެވެ.
