ކޮރަޕްޝަނުގެ ތުހުމަތުގައި ހައްޔަރުކޮށްފައި ހުންނެވި ސައުދީގެ މަޝްހޫރު ވިޔަފާރިވެރިޔާ އަދި ބިލިއަނަރު ޕްރިންސް އަލްވަލީދު ބިން ތަލާލް ދެ މަހަށް ފަހު ބަންދުން ދޫކޮށްލައިފި ކަމަށް އާއިލާއިން ބުނެފިއެވެ.

ރޮއިޓަރސްއިން ރިޕޯޓް ކޮށްފައިވާ ގޮތުގައި ޝާހީ އާއިލާގެ ބޭފުޅުންނާއި، ވަޒީރުންނާއި، އަދި މަތީ ފަންތީގެ ވިޔަފާރިވެރިންނާއިއެކު ހައްޔަރު ކުރެވުނު ޕްރިންސް ވަލީދު ރިޔާޒްގައި ހުންނަ އެ މަނިކުފާނުގެ ގެކޮޅަށް ވަޑައިގެންފައި ވަނީ ހޮނިހިރު ދުވަހުއެވެ.

ރޮއިޓަރސްއަށް ކުރިން ދެއްވި ޚާއްސަ އިންޓަވިއުއެއްގައި ޕްރިންސް ވަލީދު ވިދާޅުވެފައި ވަނީ އުއްމީދު ކުރައްވަނީ ދައުވާއެއް ނުކުރައްވައި ދުވަސްކޮޅެއްގެ ތެރޭގައި މިނިވަންވެ ވަޑައިގަންނަވާނެ ކަމަށެވެ.

"އެއްވެސް ދައުވާއެއް ނެތް. އޮތީ ހަމައެކަނި އަޅުގަނޑާ ސަރުކާރާ ދެމެދު މަޝްވަރާތަކެއް" އުމުރުފުޅުން 62 އަހަރު ފުޅުގެ ވަލީދު ވިދާޅުވިއެވެ.

ސައުދީ ވަލީ އަޙްދު މުޙައްމަދު ބިން ސަލްމާން ރިޔާސަތުގައި އިންނަވާ ސައުދީ އެންޓި ކޮރަޕްޝަން ކޮމިޓީގެ އަމުރަށް ހައްޔަރުކުރެވުނު ބޭފުޅުންގެ ތެރޭގައި ސައުދީ އިންވެސްޓްމަންޓް ކުންފުނި، ކިންގްޑަމް ހޯލްޑިންގެ ވެރިޔާ އަދި ބިލިއަނަރ ޕްރިންސް އަލްވަލީދު ބިން ތަލާލްގެ އިތުރުން ކުރީގެ މާލީ ވަޒީރު އިބްރާހިމް އަލް-އައްސާފް ވެސް ހިމެނިވަޑައިގެންނެވިއެވެ.

ކޮރަޕްޝަންގެ މައްސަލަތަކާއި ގުޅިގެން ބޮޑެތި ބާރުތަކަކާއިއެކު މިދިޔަ ނޮވެމްބަރު މަހު އެކުލަވާލި މިކޮމިޓީގެ ޗެއަރމަނަކަށް އައްޔަން ކޮށްފައިވަނީ ވަލީއަޙުދު މުޙައްމަދު ބިން ސަލްމާން އެވެ. މިކޮމިޓީގައި ދެން ތިއްބަވަނީ ސައުދީ ނޭޝަނަލް އެންޓި ކޮރަޕްޝަން އޮތޯރިޓީގެ ޗެއަރމަން، ޖެނެރަލް އޯޑިޓް ބިއުރޯގެ ޗެއަމަންގެ އިތުރުން އެޓާނީ ޖެނެރަލް އަދި ދައުލަތުގެ ސަލާމަތާބެހޭ އިސްވެރިޔާ އެވެ.

މިކޮމިޓީ އަށް ދީފައިވާ ބާރުތަކުގެ ތެރޭގައި ތަހުގީގު ހިންގުމާއި، ހައްޔަރު ކުރުމާއި، ގައުމުން ބޭރަށް ފުރުން މަނާ ކުރުމާއި، އެކައުންޓްތައް ފްރީޒް ކުރުމާއި، މަގާމްތަކުން ސަސްޕެންޑް ކުރުން އަދި ފައިސާގެ މުއާމަލާތްތަކާއި، މުދާ ހޯދާފައިވާ ގޮތުގެ ތަފްސީލް ހޯދުން ހިމެނެއެވެ.

އަލްވަލީދުގެ ކިންގްޑަމް ހޯލްޑިންގް އަކީ އެމެރިކާގެ ބޭންކެއް ކަމަށްވާ ސިޓީގްރޫޕްގެ މައި ހިއްސާދާރެކެވެ. މީގެ އިތުރުން ކިންގްޑަމް ހޯލްޑިންސްގެ ޙިއްސާ ހިމެނޭ އެހެން ވިޔަފާރިތަކުގެ ތެރޭގައި ނިއުސް ކޯޕް، ޓްވިޓަރ، ފަދަ ކުންފުނިތައް ހިމެނެއެވެ.

ދުނިޔޭގެ އެންމެ މުއްސަނދި މަހުޖަނުންގެ ތެރޭގައި ހިމެނޭ ޕްރިންސް އަލްވަލީދު ބިން ތަލާލް އަކީ، ސައުދީ އަރަބިއްޔާގެ ފައުންޑަރ އަދި ފުރަތަމަ ރަސްގެފާނު އަބްދުލްއަޒީޒް އަލް ސައުދު (އިބްނި ސައުދު) ގެ 12 ވަނަ ދަރިކަލުން ތަލާލް ބިން އަބްދުލްއަޒީޒް އަލް ސައުދުގެ ބޭކަލެކެވެ. އަލްވަލީދު މަންމާފުޅަކީ ލުބުނާނުގެ ފުރަތަމަ ބޮޑުވަޒީރު ރިއާދް އަލް ޞާލިޙްގެ ދަރިކަނބަލުން މޮނާ އަލް ޞާލިޙެވެ.

ކުރިން ދެއްވާފައިވާ އިންޓަވިއުއެއްގައި ސައުދީގެ އޮފިޝަލަކު ވިދާޅުވެފައިވަނީ ޕްރިންސް ވަލީދުގެ މައްޗަށް ކުރެވޭ ތުހުމަތުތަކުގެ ތެރޭގައި މަނީ ލައުންޑަރިންގއާއި، ރިޝްވަތާއި ،ރަސްމީ ފަރާތްތަކަށް ނޫފުޒު ފޯރުވުން ހިމެނެއެވެ.

ރޮއިޓަރސްއިން ރިޕޯޓް ކޮށްފައިވާގޮތުގައި ސައުދީގެ އިދާރާތަކުންވަނީ ހައްޔަރުކުރި ފަރާތްތަކުގެ އަތުން އެ ފަރާތްތައް މިނިވަންކުރުމުގެ ބަދަލެއްގެ ގޮތުގައި މުދަލާއި ފައިސާ ދިނުމަށް ހުށަހަޅާފައެވެ.

ސައުދީގެ އިދާރާތަކުން ބުނެފައިވަނީ އަމާޒަކީ ހައްޔަރުކުރި ފަރާތްތަކާއިއެކު ފައިސާގެ އެއްބަސްވުންތަކެއްގެ ތެރެއިން މައްސަލަ ހައްލު ކުރުން ކަމަށެވެ. އަދި އެ ގޮތުގެ މަތިން ސަރުކާރަށް 100 ބިލިއަން ޑޮލަރު ލިބޭނެ ކަމަށް ލަފާކޮށްފައިވެއެވެ.

ކޮރަޕްޝަންގެ ތުހުމަތުގައި ހައްޔަރު ކޮށްފައިވާ އެހެން ވިޔަފާރިވެރިންގެ ތެރޭގައި މިޑްލް އީސްޓް ބްރޯޑްކާސްޓިން ކޮމްޕެނީ (އެމްބީސީ) ގެ ޗެއަރމަން އަދި ސައުދީ ބިލިއަނަރު ވަލީދު ބިން އިބްރާހިމް އަލް އިބްރާހިމްއާއި އެހެނިހެން ބައެއް ފަރާތްތައްވެސް ދޫކޮށްލާފައިވާއިރު އެ ފަރާތްތައްވެސް މިނިވަންކޮށްފައިވަނީ ފައިސާގެ އެއްބަސްވުންތަކެއްގެ ތެރެއިންކަމަށް ސައުދީގެ އޮފިޝަލް ހުކުރު ދުވަހު ރޮއިޓަރސްގައި ބުނެފައިވެއެވެ.