އަފްޣާނިސްތާނުގެ ވެރިރަށް ކާބުލްގެ މެދުތެރޭ ސަރަހައްދެއްގައި ދިން ބޮމުގެ ހަމަލާއެއްގައި މަދުވެގެން 40 މީހުން މަރުވެ، 140 މީހުން ޒަޚަމްވެއްޖެއެވެ.
އާންމުން ދަތުރުކުރާ ސަރަހައްދެއްގައި ހުރި ޗެކް ޕޮއިންޓަކަށް ގޮވާތަކެތި ހުރި އެމްބިއުލާންސެއް ވައްދައި މިހަމަލާ ދިނީ ތާލިބާނުން ކަމަށް އެ ޖަމާއަތުން ވަނީ ބުނެފައެވެ.
ހޮނިހިރު ދުވަހު މިހަމަލާ ދިން ކަމަށް ތާލިބާނުން ބުނާއިރު މީގެ ހަފްތާއެއްހާ ދުވަސް ކުރިން ވެރިރަށް ކާބުލްގެ ލަގްޒަރީ ހޮޓަލަކަށް ތާލިބާނުން ދިން ހަމަލާއެއްގައި 22 މީހުން މަރުވެފައިވެއެވެ.
ހޮނިހިރު ދުވަހު ހަމަލާ ދީފައި ވަނީ ކުރީގެ އިންޓީރިއާ މިނިސްޓްރީ ބިލްޑިންގް ކައިރީގައެވެ. އަދި ޔޫރަޕިއަން ޔޫނިއަން އާއި ހައި ޕީސް ކައުންސިލް އިމާރާތް ވެސް ހުންނަނީ ހާދިސާ ހިނގި ސަރައްދާ ކައިރީގައެވެ.
އޮފިޝަލުން ބުނާ ގޮތުން ހޮނިހިރު ދުވަހު ދިން ހަމަލާގައި މަރުވި މީހުންގެ އަދަދު އިތުރުވާނެ ކަމަށް ބެލެވެއެވެ.
