އަންނަ ޖުލައި މަހުގެ ކުރިން ޒިމްބާބްވޭގައި 'ދެފުށް ފެންނަ' އިންތިޚާބެއް ބާއްވާނެ ކަމަށް އެޤައުމުގެ ރައީސް އެމަރސަން ނަންގަގްވާ ވިދާޅުވެއްޖެއެވެ.
ޒިމްބާބްވޭ އިން މިކަން ހާމަކުރައްވާފައިވަނީ ސްވިޓްޒަލޭންޑްގެ ޑާވޯސްގައި މިހާރު ކުރިއަށްދާ ވޯލްޑް އިކޮނޮމިކް ފޯރަމްގައެވެ.
ނަންގަގްވާ ވިދާޅުވީ އަންނަ މަހު އިންތިޚާބު ބޭއްވޭނެ ތާރީޚު އިޢުލާން ކުރެވޭނެ ކަމަށާއި، ޖުލައި އަށް ވުރެ ކުރިން އިންތިޚާބު އޮންނާނެ ކަމަށެވެ. ޢުމުރުފުޅުން 75 އަހަރުގެ ނަންގަގްވާ ދުނިޔޭގެ ވެރިންނާއި ވިޔަފާރިވެރިންނަށް ވިދާޅުވީ "ޒިމްބާބްވޭ އޮތީ ވިޔަފާރިއަށް ހުޅުވާލެވިފައި"ކަމަށެވެ.
"އަހަރެމެން ބޭނުންވަނީ މިނިވަން، އިންސާފުވެރި، ނަތީޖާ ޤަބޫލުކުރެވޭ އަދި ހަމަނުޖެހުމުން އެއްކިބާ ވެފައިވާ އިންތިޚާބެއް ބޭއްވުމަށް،" ނަންގަގްވާ ވިދާޅުވިއެވެ.
އޭނާ ވިދާޅުވީ އިންތިޚާބު އޮބްޒާވްކުރުމުގެ ފުރުސަތު ވެސް އޮންނާނެ ކަމަށެވެ.
"ޔޫރަޕިއަން ޔޫނިއަން ވެސް އިންތިޚާބު އޮބްޒާރވްކުރުމަށް އަންނަންވީ. އެމީހުންނަށް މަރުހަބާ ކިޔާނަން. އަހަރެމެން އިންތިޚާބުން ބަލިވެއްޖެއްޔާ ދެން އެބަލިވީ. ވެރިކަމުގެ ބާރުތަކާއި ހަވާލުވާނީ އިންތިޚާބު ކާމިޔާބުކުރާ ބައެއް."
ނަންގަގްވާ ޒިމްބާބްވޭގެ ވެރިކަމާއި ހަވާލުވެވަޑައިގަތީ 37 އަހަރުވަންދެން އެޤައުމުގައި ވެރިކަންކުރެއްވި ރޮބަރޓް މުގާބޭ އުމުރުފުޅުން 93 އަހަރުގައި މަޖުބޫރީ ހާލަތުގައި މިދިޔަ ނޮވެމްބަރު މަހު އިސްތިއުފާ ދެއްވުމާއި ގުޅިގެންނެވެ. ނަންނަގްވާ ދިގު މުއްދަތެއްވަންދެން މުގާބޭގެ ނައިބެއްގެ މަޤާމުގައި ހުންނެވިއެވެ. އެހެން ނަމަވެސް ވެރިކަމުން އިސްތިއުފާ ދެއްވުމުގެ ކުރިން މުގާބޭ ވަނީ ނަންގަގްވާ މަޤާމުން ދުރުކުރައްވާފައެވެ. އަދި އެހިސާބުން އަސްކަރިއްޔާއިން އެމައްސަލައިގެ ތެރެއަށް ވަދެ، މުގާބޭއަށް މަޤާމުން އިސްތިއުފާދެއްވުމަށް މަޖުބޫރު ކުރުވިއެވެ.
މި އިންތިޚާބަކީ ނަންގަގްވާ މަޤާމުގައި ހުންނަވާ ހުންނެވުން ޤާނޫނުގެ އިމަށް ފައްތަން ލިބިވަޑައިގަންނަވާ ފުރުސަތެކެވެ.
ސްވިޓްޒަލޭންޑްގައި ހުންނަވައިގެން ނަންގަގްވާ ވިދާޅުވީ ކޮރަޕްޝަންގެ ތުހުމަތުކުރެވުނު މުގާބޭގެ ސަރުކާރުގެ އެއްވެސް ބޭފުޅަކަށް ސިޔާސީ ހިމާޔަތް ނުދެއްވާނެ ކަމަށެވެ. އެހެން ނަމަވެސް މަޤާމުން އިސްތިއުފާ ދެއްވުމުގެ ބަދަލުގައި މުގާބޭއަށް ރައްކާތެރިކަމާއި އެހެނިގެން ޢިނާޔަތްތައް ދެއްވި ކަމަށް އެއްބަސްވެވަޑައިގަތެވެ.
