އެފްރިކާގެ ގައުމުތަކަށް ނިސްބަތްކޮށް"ޝިޓްހޯލް"އޭ ވިދާޅުވިކަމުގެ ތުހުމަތާއިއެކު އެމެރިކާގެ ރައީސް ޑޮނަލްޑް ޓްރަމްޕްއަކީ ރޭސިސްޓެއް ކަމަށް ބުނަން ފެށުމުން އެ މަނިކުފާނު އެކަން ދޮގުކުރައްވައިފިއެވެ.
ޓްރަމްޕް މިމޭރުމުން ވާހަކަ ދައްކަވާފައި މިވަނީ އެމެރިކާގެ އިމިގްރޭޝަން ޤާނޫނުތަކަށް އިސްލާހު ގެނައުމަށް ކޮންގްރެސް މެމްބަރުންނާއިއެކު ކުރެވޭ މަޝްވަރާތަކުގެ ތެރެއިން އޯވަލް އޮފީހުގައި ބޭއްވި ބައްދަލުވުމެއްގައެވެ. 'އޯފް ދަ ރެކޯޑް' ޓްރަމްޕް ދެއްކެވި ވާހަކަފުޅެއް ނަމަވެސް، މިވާހަކަތައް މީޑިއާއަށް ތިލަވެ، ޓްރަމްޕް ވަނީ އާދައިގެ މަތިން ހޫނުފެނަށް ވެއްޓިވަޑައިގެންފައެވެ. ޓްރަމްޕް އެ ބައްދަލުވުމުގައި އެއްސެވިކަމަށް ވަނީ ދަށް ފެންވަރުގެ ޤައުމުތަކުން އެމެރިކާއަށް މީހުން ގެންނަނީ ކީއްކުރަންތޯއެވެ. އަދި ނޯވޭ ފަދަ ޤައުމުތަކުން އެމެރިކާއަށް މީހުން ގެންނަން ތާޢިދުކުރައްވާ ޓްރަމްޕް ވާހަކަ ދެއްކެވިއެވެ.
އެމަނިކުފާނު ފަހުން ރިޕޯޓަރުންނަށް ވިދާޅުވީ"އަޅުގަނޑަކީ ރޭސިސްޓެއް ނޫން، އަޅުގަނޑަކީ ތިބޭފުޅުން އިންޓަވިއު ކުރާނެ އެންމެ ރޭސިސްޓްކަން ކުޑަ މީހާ"
މިއީ އެފްރިކާގެ ގައުމުތަކުގެ ރައްޔިތުންނަށް ނިސްބަތްކޮށް ނަސްލީ ތަފާތުކުރުމުގެ މޭރުމުން ވާހަކަދެއްކެވިކަމުގެ ތުހުމަތާއި ގުޅިގެން ރައީސް ޓްރަމްޕް ސީދާގޮތުން ވާހާކަދެއްކެވި ފުރަތަމަ ފަހަރެވެ.
އެ ވާހަކަ ދޮގުކުރައްވައި ވައިޓް ހައުސްގެ ރިޕޯޓަރުންނާ ރައީސް ޓްރަމްޕް ވާހަކަ ދައްކަވާފައިވަނީ ވެސްޓް ޕާމް ބީޗްގައި އޮންނަ ޓްރަމްޕް އިންޓަރނޭޝަނަލް ގޮލްފް ކްލަބްގައި އާދީއްތަ ދުވަހުއެވެ.
ރައީސް ޓްރަމްޕް އާ މެދު ދެކެވޭ ވާހަކަތައް ދޮގު ކުރައްވާ އެމަނިކުފާނު ކުރެއްވި ޓްވީޓެއްގައި ވިދާޅުވީ "އެމަނިކުފާނު އެ ވިދާޅުވާ ބަސްމަގު ބޭނުން ނުކުރައްވާ ކަމަށާއި" އެހެންނަމަވެސް "ވަރުގަދަ" ބަސްމަގެއް ބޭނުން ކުރެއްވި ކަމަށެވެ.
އެފްރިކަން ޔޫނިއަންއިން ވެސް ވަނީ ޓްރަމްޕްގެ ވާހަކަތަކާއިމެދު ކަންބޮޑުވުން ފާޅުކޮށްފައެވެ. މީގެ އިތުރުން ރައީސް ޓްރަމްޕް ގެ ވާހަކަފުޅާ މެދު އދގެ އިންސާނީ ހައްޤުތަކާއި ބެހޭ ހައިކޮމިޝަނަރުގެ އޮފީހުން ބުނީ ޓްރަމްޕްގެ ވާހަކަފުޅަކީ ގައުމުތަކަށް ބުނާ ބަދު ބަހެއްގެ އިތުރުން، ނަސްލީ ތަފާތުކުރުންތަކަށް ހިތްވަރު ލިބޭ ވާހަކަ ތަކެއްކަމަށެވެ.
