އިންޑިއާއިން އެހެން ޤައުމުތަކުގެ ޓެރިޓަރީއަށް ލޯ ނާޅާ ކަމަށާއި، އެޤައުމުން އިސްކަން ދެނީ އެހެން ޤައުމުތަކުގެ ވަޞީލަތްތައް ތަރައްޤީކުރަން ކަމަށް އެޤައުމުގެ ބޮޑުވަޒީރު ނަރެންދުރަ މޯދީ ވިދާޅުވެއްޖެއެވެ.
އެހެން ޤައުމުތަކުގައި ތިއްބަވާ އިންޑިއާ ދަރިކޮޅުގެ ޤާނޫނު ހަދާ މަޖިލިސް މެމްބަރުންގެ ކޮންފަރެންސް ހުޅުވައިދެއްވުމަށް ދިއްލީގައި ވާހަކަ ދައްކަވަމުން މޯދީ ވިދާޅުވީ އެހެން ޤައުމުތަކުގެ ވަޞީލަތްތައް ނަހަމަ ގޮތުގައި ބޭނުންކުރުމުގެ ވިސްނުން އިންޑިއާއިން ނުގެންގުޅޭ ކަމަށެވެ. އަދި އިންޑިއާގެ އަމާޒު އަބަދުވެސް ހުރީ އެހެން ޤައުމުތަކުގެ ވަަޞީލަތްތައް ތަރައްޤީކޮށް، ޤާބިލްކަން އިތުުރުކޮށްދިނުމަށް އެހީތެރިވުމަށް ކަމަށް ބޮޑުވަޒީރު ވިދާޅުވިއެވެ. "ދެ ބޮޑު ހަނގުރާމައިގައި އިންޑިއާގެ އެތައް ހާސް ސިފައިންނެއް ޤުރުބާންވެފައިވޭ. އެކަމަކު އެހެން ޤައުމެއްގެ ސަރަހައްދެއްގެ އެންމެ އިންޗިއެއް ހޯދާކަށް ވެސް އިންޑިއާއިން މަސައްކަތް ނުކުރޭ،" މޯދީ ވިދާޅުވިއެވެ.
ބޮޑުވަޒީރު މޯދީ ވިދާޅުވީ ހިތާމަވެރި ޙާލަތްތަކުގައި ވެސް އިންޑިއާއިން މަސައްކަތް ކުރަނީ މުޅި ދުނިޔެއަކީ އެއް އާއިލާއެއް ކަމަށް ބަަލައިގެން ކަމަށެވެ. އޭގެ މިސާލެއްގެ ގޮތުގައި މޯދީ ފާހަގަކުރެއްވީ ނޭޕާލުގައި ބިންހެލުން އައިސްގެން އިންޑިއާއިން ދިން އެހީއާއި، ލަންކާގައި ފެންބޮޑުވުމުން ދިން އެހީ އާއި، ރާއްޖޭގެ ވެރިރަށް މާލެ ފެނަށް ޖެހުމުން ފެން ފޯރުކޮށްދިނުން ފަދަ ކަންކަމެވެ. މި ޤައުމުތަކަކީ އެހެން ޤައުމުތަކާއިއެކު ގާތް ގުޅުންތައް ބާއްވާ ޤައުމުތައް ނަމަވެސް، ޙާލުގައި ޖެހުނު ވަގުތު އެންމެ ފުރަތަމަ އެހީތެރިވީ އިންޑިއާއިންނެވެ.
21 ވަނަ ޤަރުނަކީ އޭޝިއާގެ ޤަރުނުކަމަށް ފާހަގަކުރައްވައި މޯދީ ވިދާޅުވީ އިންޑިއާގެ މުހިއްމުކަން ކުރިއަށް އޮތްތަނުގައި ބޮޑުވެގެން ދާނެ ކަަމަށެވެ. ނަރެންދުރަ މޯދީގެ ވެރިކަމުގައި އިޤްތިޞާދީ ގޮތުން އިންޑިއާއިން ގެންދަނީ ހަރުދަނާ ފިޔަވަޅުތަކެއް އަޅަމުންނެވެ. އެގޮތުން ޓެކްސްގެ ނިޒާމް ހަރުދަނާ ކުރެއްވުމާއި، ދައުރުވާ ފައިސާގެ މިންވަރު މަދުކުރުމަށް މަސައްކަތް ކުރެއްވުމާއި، ކަޅުފައިސާ އާއި ދެކޮޅަށް ކުރައްވާ މަސައްކަތްޕުޅު ފާހަގަކޮށްލެވެއެވެ.
