ގުސްތަވް އާރް ނުވަތަ ސްޓޭޖު ނަމުން ނަމަ ލިލް ޕީޕް މަރުވެއްޖެއެވެ.
ލިލް ޕީޕް މަރުވެފައި އޮއްވާ ފެނުނީ އޭނާ ޓުއާ ދެމުންދިޔަ ބަހުގެ ތެރޭގައެވެ. ލިލް ޕީޕް ބަހުގެ ތެރޭގައި މަރުވެފައި އޮއްވާ ފެނުނީ އޭނާގެ މެނޭޖަރަށެވެ.
އެމެރިކާގެ ފުލުހުންނާއި ހަވާލާދީ ނޫސްތަކުގައި ބުނެފައިވަނީ ލިލް ޕީޕް މަރުވެފައިވަނީ ބާރުގަދަ ޑްރަގެއް ބޭނުންކޮށްގެން އޯވަޑޯޒް ވެގެންނެވެ.
އުމުރުން 21 އަހަރުގެ ލިލް ޕީޕް "ކަމް އޯވަރ ވެން ޔޫއާ ސޮބާ"ގެ ނަމުގައި އެންމެ ފުރަތަމަ އަލްބަމެއް ނެރުނީ މިއަހަރުގެ އޮގަސްޓު މަހުގެ 11 ގައެވެ. ލިލް ޕީޕް މަރުވީ އަލްބަމް ނެރުމަށް ފަހު ޓުއާ ދެމުން ދަނިކޮށެވެ. މަރުވިއިރު އެ ޓުއާ ނިމެން ބާކީ އޮތީ ދެ ދުވަހެވެ.
އެމެރިކާގެ ފުލުހުން ބުނެފައިވަނީ ލިލް ޕީޕް މަރާއި ގުޅިގެން އިތުރު އެއްޗެއް ބުނަން އެނގޭނީ އެޓޮޕްސީ ހެދުމަށްފަހުގައި ކަމަށެވެ.
ލިލް ޕީޕް ވަނީ އޭނާ މަރުވެފައި އޮއްވާ ފެނުމުގެ ދެތިން ގަޑިއިރުގެ ކުރިން އޭނާގެ ފޭސްބުކް ޕޭޖުގައި ގިނަ ބޭސްތަކެއް ބޭނުންކޮށްފައިވާ ކަމަށްބުނެ ވީޑިއޯ އެއް ޕޯސްޓު ކޮށްފައެވެ. އެ ވީޑިއޯގައި އޭނާ ރަނގަޅު ކަމަށާއި ބަލި ނޫން ކަމަށް ވަނީ ބުނެފައެވެ.
މީގެ އިތުރުން ލިލް ޕީޕް ވަނީ އޭނާ މަރުވުމުގެ ދެތިން ގަޑިއިރުގެ ކުރިން އިންސްޓަގްރާމަށް ޖެހިޖެހިގެން ފޮޓޯތަކެއް ލާފައެވެ.
އޭގެން އެއް ފޮޓޯގައި ބުނެފައިވަނީ އޭނާ މަރުވުމުން އޭނާ ދެކެ ލޯބިވާނެ ކަމަށެވެ. އަދި އަނެއް ފޮޓޯގައި އޭނާ ކުރިން "ހޯމްލެސް" ވެފައިވާ ކަމަށް ބުނެ ފޮޓޯއެއް ލާފައިވެއެވެ. އެންމެ ފަހުން ލިލް ޕީޕް އިންސްޓަގްރާމަށް ލާފައިވާ ފޮޓޯއަކީ އޭނާގެ ފޭނުންނާއި އެކު ނަގައިފައިވާ ފޮޓޯއެކެވެ.
