ސައިފް އަލީޚާން އާއި ކަރީނާ ކަޕޫރުގެ ދަރިފުޅު ތައިމޫރު އަލީ ޚާންއަށް އެއް އަހަރު ފުރޭނީ ޑިސެމްބަރު މަހުގެ 20 ވަނަ ދުވަހުގައެވެ.

ސައިފް މިވަނީ ތައިމޫރުގެ އުފަންދުވަހާއި ދިމާކޮށް ތައިމޫރަށް ޖިޕެއް ގަނެދީފައެވެ. ތައިމޫރަށް ސައިފް ގަނެދިން ކާރަކީ އެސްއާރްޓީ ބްރޭންޑުގެ ރަތް ކުލައިގެ (ޗެރީ ރެޑް) ޖިޕެކެވެ. ސައިފް ގަބޫލު ކުރާގޮތުގައި ތައިމޫރަށް އެކުލަ ވަރަށް ކަމުދާނެއެވެ.

މި ޖިޕު ގަތުމަށް ފަހު މީޑިއާއަށް މައުލޫމާތު ދެމުން ސައިފް ބުނީ މިޖިޕުގެ ފަހަތު ސީޓުގައި ތައިމޫރަށް ޚާއްސަ "ބޭބީ ސީޓެއް" އިންނާނެ ކަމަށާއި އެއީ ސެކިއުރިޓީ ގޮތުން ވެސް ރަނގަޅު ސީޓެއް ކަމަށެވެ. ސައިފް ބުނީ މި ޖިޕުގައި ގައި އެންމެ ފުރަތަމަ "ރައިޑް"ގެ ނަސީބު ލިބޭނީ ތައިމޫރަށެވެ.

ސައިފް ބުނީ އޭނާގެ ދަރިންނަކީ ދިރިއުޅުމުގައި އެންމެ މުހިއްމު ބައެއް ކަމަށާއި އެމީހުންނަށްޓަކައި ކޮންމެފަދަ ކަމެއްވެސް ކުރަން އޭނާ ހުރީ ތައްޔާރަށް ކަމަށެވެ. މި ޖިޕުގެ  އަގު ގާތްގަނޑަކަށް 1.03 ކުރޯޑް އިންޑިއަން ރުޕީސްއަށް އަރާނެ ކަމަށް އިންޑިއާގެ ނޫސްތަކުގައި ވަނީ ބުނެފައެވެ.

ޖިޕަކީ ދަތުރުކުރުމަށް ބޭނުންކުރާ އެންމެ ރަނގަޅު އުޅަނދު ކަމަށް ސައިފް ބުންޏެވެ. ސައިފް ބުނީ މިހާރުވެސް ތިން ޖިޕް އޭނާ ބޭނުން ކުރާކަމަށެވެ. ދިގު ދަތުރުތަކަށް އޭނާ ޖިޕް ބޭނުން ކުރިޔަސް ކުރު ދަތުރުތަކަށް އޭނާ ބޭނުން ކުރަނީ ކާރު ކަމަށް ސައިފް ބުންޏެވެ.