ކާމިޔާބު ފްރަންޗައިޒް ފިލްމު "ރޭސް"ގެ ތިން ވަނަ ފިލްމު "ރޭސް 3"ގެ ފުރަތަމަ ފެނިލުން ހޯމަ ދުވަހުގައި ދައްކާލައިފިއެވެ.
ސަލްމާން ޚާން ވަނީ އޭނާގެ ރަސްމީ ޓްވިޓާގައި "ރޭސް 3" ގެ ޝޫޓިން ފެށިއްޖެ ކަމަށް ބުނެ އޭނާގެ ފޮޓޯއެއް އާންމު ކޮށްފައެވެ. އެ ފޮޓޯގައި ސަލްމާން ފެންނަނީ ބަޑިއެއް ދިއްކޮށްލައިގެން ހުންނަ މަންޒަރެވެ.
"ރޭސް 3"ގެ ލީޑް ރޯލުން ފެނިގެން ދަނީ ސަލްމާން ޚާންގެ އިތުރުން ޖެކޮލިން ފެނާންޑޭޒް އެވެ. މީގެ އިތުރުން ބޮބީ ޑިއޯލް އާއި ޑެއިޒީ ޝާހްގެ އެކްޓިން ފެނިގެންދާނެއެވެ.
"ރޭސް" ގެ ފުރަތަމަ ފިލްމު ނެރެފައި ވަނީ 2008 ވަނަ އަހަރުގައެވެ. އަދި ދެ ވަނަ ފިލްމު "ރޭސް 2" ބެލުންތެރިންނާއި ހަމައަށް އައިސްފައި ވަނީ 2013 ވަނަ އަހަރުގައެވެ. މި ފިލްމުގެ ޝޫޓިން ފަށާފައިވަނީ އަބޫދާބީ ގައެވެ. އެއަށްފަހު އިންޑިއާގެ މުމްބާއީގައި ފިލްމުގެ މަންޒަރުތައް ނަގާނެ ކަމަށް ޚަބަރުތައް ބުނެއެވެ.
"ރޭސް3" ގެ ޑައިރެކްޓަރަކީ ރޭމޯ ޑި ސޫޒާއެވެ. ޝޫޓިން ފެށުމަށްޓަކައި ރޭމޯ ވަނީ އޭނާގެ ޓީވީ ޝޯ ކަމަށްވާ "ޑާންސް ޗެމްޕިއަންސް"ގެ ޝޫޓިން ވެސް ފަސްކޮށްފައެވެ.
"ރޭސް3" އަކަށް މީގެ ކުރިން ވަނީ ސައިފް އަލީ ޚާން އާއި ޝާހުރުކް ޚާން އަށް ލީޑް ރޯލު ކުޅުމަށް ފުރުސަތު ދީފައެވެ. އެހެން ނަމަވެސް އެދެ އެކްޓަރުން ވަނީ "ރޭސް 3" ކުޅުމާއި ދެކޮޅު ހަދާފައެވެ. އެހެން ކަމުން "ރޭސް2" އިން ލީޑް ރޯލުން ފެނިގެންދާ ސައިފް އަލީ ޚާން ގެ ބަދަލުގައި މި ފިލްމުން ފެނިގެންދާނީ ސަލްމާން ޚާންއެވެ.
