ފޯމިއުލާ ވަންގެ ދުނިޔޭގެ ޗެމްޕިއަންކަން އިނގިރޭސިވިލާތުގެ ލުއިސް ހެމިލްޓަން ހޯދައިފިއެވެ.
މި ސީޒަނުގެ ފޯމިއުލާ ވަންގެ ޗެމްޕިއަންކަން ހެމިލްޓަން ކަށަވަރުކުރީ މެކްސިކޯގެ "އޮޓޯޑްރޯމް ހަރްމާނޯ ރޮޑްރިގޭސް" ސާކިޓްގައި ބޭއްވި މެކްސިކޯ ޖީޕީގެ ނުވަ ވަނަ ހޯދައިގެންނެވެ. އޭނާއަށް ޗެމްޕިއަންކަން ޔަގީންވީ ދެވަނައިގައި އޮތް ފެރާރީގެ ސެބެސްޓިއަން ވެޓެލްއަށް ބާކީ އޮތް ދެ ރޭސް ކާމިޔާބުކުރި ނަމަވެސް އޭނާއާ އެއް އަދަދަކަށް ޕޮއިންޓް ނުލިބޭނެ ކަން ޔަގީންވީމައެވެ.
އާދިއްތަ ދުވަހު ބޭއްވި މެކްސިކޯގައި ބޭއްވި 71 ލެޕުގެ މި ރޭހުން އެއްވަނަ ހޯދީ ރެޑްބުލް ރޭސިންގެ މެކްސް ވާސްޓެޕަންއެވެ. އޭނާ މި ރޭސް ނިންމާފައިވަނީ އެއް ގަޑިއިރާ 36 މިނެޓުންނެވެ. ދެވަނައަށް ރޭސް ނިންމި މާސިޑީސްގެ ވަލްޓޭރީ ބޯޓާސް ރޭސް ނިންމާފައިވަނީ ވާސްޓެޕަންއަށްވުރެ 19.67 ސިކުންތު ލަހުންނެވެ. އަދި ތިންވަނައަށް ރޭސް ނިންމި ފެރާރީގެ ކިމީ ރައިކޮނެންއަށް ރޭސް ނިންމާލެވުނީ ވާސްޓެޕަންއަށްވުރެ 54 ސިކުންތު ލަހުންނެވެ.
މުޅި ސީޒަނުގައި ވެސް ހެމިލްޓަންއާ އެންމެ ވާދަކުރި ފެރާރީގެ ސެބެސްޓިއަން ވެޓެލް ހަތަރު ވަނައިގައި އޮވެގެން ރޭސް ނިންމާލިއިރު ހެމިލްޓަން ރޭސް ނިންމާލީ ނުވަ ވަނައިގައި އޮވެގެންނެވެ.
ރޭސް ނިންމާލުމަށްފަހު ވާހަކަ ދައްކަމުން ހެމިލްޓަން ބުނެފައިވަނީ އެނާއަށް ޗެމްޕިއަންކަން ލިބޭނެ ކަމުގެ އުއްމީދު އަބަދުވެސް އޮތް ކަމަށާއި އެންމެ ފަހު ވަގުތާ ޖެހެންދެން ވެސް މަސައްކަތް ކުރީ ޗެމްޕިއަނަކަށް ވުމަށް ކަމަށެވެ. ހަމައެހެންމެ ފާއިތުވެދިޔަ ފަސް އަހަރު ތެރޭ އޭނާގެ ޓީމު ކަމަށްވާ މާސިޑީސް ރޭސިންގެ ފަރާތުން އެއްވެސް މައްސަލައެއް ފެނިފައި ނުވާ ކަމަށާއި އެ ޓީމުގެ ޑްރައިވަރަކަށް ވުމަކީ އޭނާ ވަރަށް ފަހުރުވެރިވާ ކަމެއް ކަމަށް ހެމިލްޓަން ބުނެފައިވެއެވެ. އެނާ ވަނީ އޭނާގެ އާއިލާއަށާއި ރައްޓެހިންގެ އިތުރުން ސަޕޯޓަރުންނަށް ޝުކުރު އަދާކޮށްފައެވެ.
ހެމިލްޓަން ފޯމިއުލާ ވަންގެ މި ސީޒަނުގެ ޗެމްޕިއަންކަން ކަށަވަރުކުރީ 333 ޕޮއިންޓާއެކުއެވެ. ފެރާރީގެ ޑްރައިވަރު ވެޓެލް އޮތީ 277 ޕޮއިންޓާއެކު ދެވަނައިގައެވެ. އަދި 262 ޕޮއިންޓާއެކު ތިންވަނައިގައި އޮތީ މާސިޑީސްގެ ވަލްޓޭރީ ބޯޓާސްއެވެ.
ޓީމުތަކުގެ ރޭންކިންގެ އެއްވަނައިގައި 595 ޕޮއިންޓާއެކު މާސިޑީސް އޮތްއިރު 455 ޕޮއިންޓާއެކު ދެވަނައިގައި އޮތީ ފެރާރީއެވެ. އަދި ފެރާރީގެ ފަހަތުން 340 ޕޮއިންޓާއެކު ތިންވަނައިގައި އޮތީ ރެޑްބުލް ރޭސިންއެވެ. މާސިޑީސް އިން ވަނީ މިއަހަރުގެ ކޮންސްޓްރަކްޓާސް ޗެމްޕިއަންޝިޕް ކަށަވަރު ކޮށްފައެވެ.
މި ސީޒަނުގައި މިހާތަނަށް 9 ރޭސް ހެމިލްޓަން ކާމިޔާބު ކޮށްފައިވާއިރު މިއީ އޭނާ ފޯމިއުލާ ވަންގެ ޗެމްޕިއަންކަން ހޯދި ހަތަރު ވަނަ ފަހަރެވެ. މި ތައްޓާއެކު ވެޓެލްއާ އެއް އަދަދަކަށް އޭނާ ޗެމްޕިއަންޝިޕް ކާމިޔާބު ކޮށްފައިވާއިރު އޭނާއަށްވުރެ ގިނައިން ފޯމިއުލާ ވަންގެ ޗެމްޕިއަންކަން ހޯދާފައިވަނީ އާޖެންޓީނަގެ ހުއާން މެނުއެލް ފަންޖިއޯ އާއި ފޯމިއުލާ ވަންގެ އެންމެ ކާމިޔާބު ޑްރައިވަރު މައިކަލް ޝުމޭކާއެވެ. އަދި ހެމިލްޓަން އަކީ އިނގިރޭސިވިލާތަށް ނިސްބަތްވާ އެންމެ ކާމިޔާބު ފޯމިއުލާ ވަންގެ ޑްރައިވަރެވެ.
ފޯމިއުލާ ވަންގެ ސީޒަނުގައި ބާކީ ދެ ރޭސް އޮތްއިރު ދެން ރޭހެއް އޮންނާނީ ނޮވެމްބަރު މަހުގެ 12 ވަނަ ދުވަހު ބްރެޒިލްގެ "އޮޓޯޑްރޯމް ހޯސޭ ކާލޯސް ޕޭސް" ސާކިޓްގައެވެ.
