އުރީދޫ ދިވެހި ލީގުގައި އަލީ އަޝްފާގު (ދަގަނޑޭ) ގެ ހެޓްރިކާ އެކު އއ. މާޅޮސް ބަލިކޮށް، ނިއުރޭޑިއަންޓް ސްޕޯޓްސް ކްލަބް ޕޮއިންޓް ތާވަލުގެ އެއްވަނައިގައި ދެ ޕޮއިންޓްގެ ލީޑެއް ނަގައިފިއެވެ.

ބުރާސްފަތި ދުވަހުގެ ރޭ މާޅޮސްއާ ވާދަކޮށް ނިއު މެޗު ކާމިޔާބުކުރީ 7-1 ގެ ނަތީޖާއަކުންނެވެ.

ގަލޮޅު ދަނޑުގައި ކުޅުނު މި މެޗު ފެށިގެން ފަސްވަނަ މިނެޓުގައި ނިއު އިން ވަނީ މެޗުގެ ލީޑު ނަގާފައެވެ. މި ލަނޑު އެޓީމަށް ކާމިޔާބުކޮށްދިނީ ދަގަނޑޭއެވެ. އެހެން ނަމަވެސް 17 ވަނަ މިނެޓުގައި މާޅޮސްގެ އަހުމަދު އާރިފް ވަނީ ނަތީޖާ ހަމަހަމަކޮށްފައެވެ.

މި ލަނޑާއެކު ނިއު އިން ވަނީ އެޓީމުގެ އެޓޭކްތައް ވަރުގަދަކޮށްފައެވެ. އެގޮތުން އެޓީމަށް ވަނީ ލީޑު ނެގުމަށް ގިނަ ފުރުސަތުތަކެއް ލިބި ބޭކާރުވެފައެވެ. ފުރަތަމަ ހާފް ނިމުނީ 1-1 ގެ ނަތީޖާއިން ދެޓީމު އެއްވަރުވެގެންނެވެ.

ދެވަނަ ހާފް ފެށިގެން ފުރަތަމަ މިނެޓުގައި ދަގަނޑޭ ވަނީ ލަނޑެއް ކާމިޔާބުކޮށް، އަލުން ނިއު އަށް ލީޑު ނަގައިދީފައެވެ. އޭގެ ހަތަރު މިނެޓު ފަހުން ދަގަނޑޭގެ އެހީތެރިކަމާއެކު އަހުމަދު އަބްދުﷲ ލިލީ ވަނީ ނިއު އަށް ލީޑު ފުޅާކޮށްދީފައެވެ.

މި ލަނޑުތަކަށް ފަހު، ނިއު އިން ދިޔައީ މާޅޮހުގެ ގޯލަށް ފުލުފުލުގައި ނުރައްކާކުރަމުންނެވެ. ނިއުގެ ހަތަރުވަނަ ލަނޑު ކާމިޔާބުކުރީ ދަގަނޑޭގެ އެހީތެރިކަމާއެކު އިބްރާހިމް ފަޒީލް (އޮއްޕޮ) އެވެ.

ނިއުގެ ފަސްވަނަ ލަނޑު 76 ވަނަ މިނެޓުގައި އަލީ ފާސިރު (ސެންޓޭ) ކާމިޔާބުކުރިއިރު، ހަވަނަ ލަނޑު ކާމިޔާބުކޮށް ދަގަނޑޭ ވަނީ މެޗުގައި އޭނާގެ ހެޓްރިކް ފުރިހަމަކޮށްފައެވެ. އަދި އެޓީމުން ޖެހި ހަތްވަނަ ލަނޑު 89 ވަނަ މިނެޓުގައި ގަލާޑޯގެ އެހީތެރިކަމާއެކު ކާމިޔާބުކުރީ ސެންޓޭއެވެ.

މި ނަތީޖާއާއެކު ނިއު ވަނީ 27 ޕޮއިންޓް ހަމަކޮށްފައެވެ. ނިއުގެ ފަހަތުން 25 ޕޮއިންޓާއެކު، ޕޮއިންޓް ތާވަލުގެ ދެވަނައިގައި އޮތީ ޓީސީ ސްޕޯޓްސްއެވެ. ތިންވަނައިގައި 20 ޕޮއިންޓާއެކު މާޒިޔާ އޮތްއިރު، ހަތަރުވަނައިގައި އޮތީ ގްރީން ސްޓްރީޓެވެ.