ބޮލީވުޑްގެ ތަރި އީޝާ ޑިއޯލް އާއި އޭނާގެ ފިރިމިހާ ބާރަތު ތަހްތާނީއަށް އަންހެން ދަރިއަކު ލިބިއްޖެއެވެ.
އެދެމީހުންގެ އާއިލާއިން ބުނެފައިވަނީ އީޝާއާއި ބާރަތަށް އަލަތު ދަރިއެއް ލިބުމުން ތިބީ ވަރަށް އުފަލުން ކަމަށެވެ. އީޝާއާއި ދަރިފުޅުގެ ހާލު ރަނގަޅު ކަމަށާއި މިވަގުތު ތިބީ ހިންދުޖާ ހޮސްޕިޓަލުގައ ކަމަށް ބުނެފައިވެއެވެ. އަދި ހޮސްޕިޓަލުން ދޫކޮށްލާނީ މާދަމާގެ ވަގުތެއްގައެވެ.
އީޝާ ޑިއޯލް އަކީ ފިލްމީ ތަރި ދަރުމެންދުރާ ޑިއޯލް އަދި ހެމާ މާލިނީގެ ދޮށީ އަންހެން ދަރިފުޅެވެ. އަދި ފިލްމީ ތަރި ސަނީ ޑިއޯލް އަދި ބޮބީ ޑިއޯލް ގެ އެއްބަފާ ކޮއްކޮ ވެސް މެއެވެ.
ފިލްމް ކުޅުމުގެ އިތުރުން އީޝާ ޑިއޯލް އަކީ މަންމަ ހެމާ މާލިނީ ފަދައިން ކްލެސިކް ޑާންސް ދަސްކޮށްފައިވާ ނެށުން ތެރިއެކެވެ. މީގެ އިތުރުން އީޝާ ޑިއޯލަކީ އިންޑިޔާގެ ގައުމީ ފެންވަރުގައި އަންހެނުންގެ ފުޓްބޯޅަ ކުޅޭ ފުޓްބޯޅަ ކުޅުންތެރިއެއް ވެސް މެއެވެ.
އީޝާ ޑިއޯލް ހިންދީ ފިލްމީ ދާއިރާއަށް ނިކުތީ 2002 ވަނަ އަހަރު ނިކުތް ކޮއިމޭރޭ ދިލްސޭ ޕޫޗޭ އިންނެވެ. މިހާތަނަށް 20 އަށް ވުރެ ގިނަ ފިލްމްތަކުގައި މައި ރޯލް ތަކުން އީޝާ ފެނިގެން ގޮސްފައި ވެއެވެ.
ފުރަތަމަ ފިލްމްގައި އީޝާ އާއިއެކު ހަރަކާތްތެރި ވެފައިވަނީ އަނިލް ކަޕޫރުގެ ކޮއްކޮ ސަންޖޭ ކަޕޫރު އަދި އާފްތާބް ސިވްދަސާނީ އެވެ. އީޝާ ކުޅެފައިވާ ފިލްމް ތަކުގެ ތެރެއިން އެންމެ ފުރަތަމަ ހިޓްވި ފިލްމަކީ 2004 ވަނަ އަހަރު ނިކުތް ދޫމް އެވެ. އޭގެ ފަހުން ނިކުތް ކާލް އަކީ ވެސް ހިޓްވި ފިލްމެކެވެ.
އީޝާގެ ފިލްމް ތަކުގެ ތެރެއިން އެންމެ ފަހުން ނިކުމެފައިވާ ފިލްމަކީ 2008 ވަނަ އަހަރު ކުރީކޮޅު ނިކުމެފައިވާ ސަންޑޭއަދި ވަން ޓޫ ތްރީ އެވެ.
