އެވަޓަންގެ ކޯޗުކަމުން އޭނާ ވަކިކޮށްފާނެ ކަމަށް އެވަޓަންގެ ކޯޗު ރޮނަލްޑް ކޯމަން ބުނެފިއެވެ.

ޔޫރޮޕާ ލީގުގައި އޮލިމްޕިކް ލިޔޯން އަތުން 1-2 ގެ ނަތީޖާއިން އެވަޓަން ބަލިވި މެޗަށް ފަހު ނޫސްވެރިންނަށް މައުލޫމާތު ދެމުން ކޯމަން ބުނީ މެޗަކުން ބަލިވެއްޖެ ނަމަ، އަބަދުވެސް ފެންނާނީ ކޯޗުގެ ގޯސްކަން ކަމަށެވެ. އެގޮތުން މަގާމުން ވަކިކޮށްފާނެ ކަމަށް ބެލެވޭ ކަމަށް އޭނާ ވަނީ ބުނެފައެވެ.

ކޯމަން ބުނީ ޓީމު ރަނގަޅުކުރުމަށް ވަރަށް ބުރަކޮށް މަސައްކަތްކުރަމުން އަންނަ ކަމަށެވެ. އެހެންނަމަވެސް އޭނާ ވަކިކުރުމުގެ ބާރު ކްލަބްގެ ބޯޑަށް އެބައޮތް ކަމަށާއި، ރަނގަޅަށް މަގާމުގެ މަސްއޫލިއްޔަތު އަދާނުކުރެވޭ ނަމަ ވަކިކުރުން އެއީ އެންމެ ރަނގަޅު ގޮތް ކަމަށް ވެސް ކޯމަން ވަނީ ބުނެފައެވެ.

އެވަޓަން މި ސީޒަނުގައި ކުޅުނު 12 މެޗުގެ ތެރެއިން މޮޅުވެފައި ވަނީ އެންމެ ދެ މެޗުންނެވެ. އެޓީމު ލިޔޯން އަތުން ވީ ބައްޔާ އެކު މިހާރު އޮތީ ގްރޫޕް އީގައި އެންމެ ޕޮއިންޓަކާ އެކު ފުލުގައެވެ.

ޕްރިމިއާ ލީގުގައި އެވަޓަން މިހާތަނަށް އަށް މެޗު ކުޅެފައިވާއިރު، އެޓީމު މޮޅުވީ ދެ މެޗުންނެވެ. ހަތަރު މެޗުން އެޓީމު ބަލިވިއިރު، ދެ މެޗުން ވަނީ އެއްވަރުވެފައެވެ. އެވަޓަން އޮތީ އަށް ޕޮއިންޓާއެކު ޕްރިމިއާ ލީގުގެ 16 ވަނައިގައެވެ.

ޕްރިމިއާ ލީގުގައި އެވަޓަން އަންނަ އާދީއްތަ ދުވަހު ނިކުންނާނީ އަމިއްލަ ދަނޑުގައި އާސެނަލްއާ ދެކޮޅަށެވެ. މި މެޗު ފަށާނީ ރާއްޖެ ގަޑިން އާދިއްތަ ދުވަހު ހަވީރު 17:30 ގައެވެ.