އެމެރިކާގެ ނެޝެނަލް ބާސްކެޓްބޯލް ލީގު (އެންބީއޭ) ގައި ކްލީވްލޭންޑް ކެވެލިއާސް ކުޅުނު މެޗު އެ ޓީމުން ކާމިޔާބު ކުރިއިރު ގޯލްޑަން ސްޓޭޓް ވޯރިއާސް ބަލިވެއްޖެއެވެ.

އެންބީއޭގެ ސީޒަން ހުޅުވުމުގެ ގޮތުން ބޯސްޓަން ސެލްޓިކްސްއާ ދެކޮޅަށް ކުޅުނު މެޗު ކްލީވްލޭންޑް ކެވެލިއާސް އިން ކާމިޔާބު ކޮށްފައި ވަނީ 99 ޕޮއިންޓް 102 ޕޮއިންޓްއިންނެވެ. މިދިޔަ ސީޒަނުގައި އެންބީއޭ ޗެމްޕިއަންޝިޕުގެ ފައިނަލްގައި ވާދަކުރި ކެވެލިއާސްއަށް މި މެޗުގައި އެންމެ ގިނަ ޕޮއިންޓް ހޯދައިދިނީ ދުނިޔޭގެ އެންމެ މޮޅު ބާސްކެޓް ކުޅުންތެރިޔާގެ ގޮތުގައި ގިނަ ބަޔަކު ދެކޭ ލެބްރޯން ޖޭމްސްއެވެ. އޭނާ ކެވެލިއާސްއަށް 29 ޕޮއިންޓް ހޯދައިދީ 9 އެސިސްޓްކޮށް 16 ރީބައުންޑް ނަގާފައިވެއެވެ.

މި މެޗުގައި ބޯސްޓަން ސެލްޓިކްސްއަށް އެންމެ ގިނަ ޕޮއިންޓް ހޯދައިދިން ކުޅުންތެރިޔަކީ އެ ޓީމުގެ ޖޭލެން ބްރައުންއެވެ. އޭނާ ސެލްޓިކްސްއަށް 25 ޕޮއިންޓް އެއްކޮށްދިން އިރު 6 ރީބައުންޑް ވެސް އޭނާ ނަގާފައިވެއެވެ. މި މެޗުގައި ސެލްޓިކްސް އާއި އަލަށް ގުޅުނު ގޯޑަން ހޭވާޑްގެ ފައިގެ ކުޑަހުޅަށް ލިބުނު އަނިޔާއަކާ ގުޅިގެން ވަނީ ވަކި ހިސާބަކުން ބާލާފައެވެ.

މިދިޔަ ސީޒަނުގައި އެންބީއޭގެ ޗެމްޕިއަންކަން ހޯދި ގޯލްޑަން ސްޓޭޓް ވޯރިއާސް ކުޅުނު ފުރަތަމަ މެޗުން އެ ޓީމު ބަލިވީ ހިއުސްޓަން ރޮކެޓްސްއާ ވާދަކޮށް 121 ޕޮއިންޓް 122 ޕޮއިންޓްއިންނެވެ. މި މެޗުގައި ހިއުސްޓަން ރޮކެޓްސްއަށް އެންމެ ގިނަ ޕޮއިންޓް ހޯދައިދިން ކުޅުންތެރިޔަކީ ޖޭމްސް ހާޑެންއެވެ. އޭނާ ވަނީ އެ ޓީމަށް 27 ޕޮއިންޓާއި 10 އެސިސްޓް ހަދާފައެވެ. ވޯރިއާސްއަށް އެންމެ ގިނަ ޕޮއިންޓް ހޯދައިދިނީ 22 ޕޮއިންޓް އެ ޓީމަށް ހޯދައިދިން ސްޓެފަން ކަރީއެވެ.

އެންބީއޭގެ މި ސީޒަން ފަށާފައިވާއިރު ފޯރިގަދަ ގިނަ މެޗުތަކެއް މިފަހަރުވެސް ފެނިގެން ދާނެއެވެ.