މިޔަންމާގެ ރޮހިންޖާ މުސްލިމުންގެ ހައްގުގައި އދ އަށް އެކަށޭނަ މަސައްކަތެއް ނުކުރެވޭ ކަމުގެ ފާޑުކިޔުން އަމާޒުވެފައިވާ މިދަނޑިވަޅުއްގައި، މިޔަންމާގައި މިވަގުތު ހަރަކާތްތެރިވެވަޑައިގަންނަވާ އދ ގެ އެންމެ އިސް އޮފިޝަލް އެގައުމު ދޫކުރައްވާ ވަޑާއިގަންނަވަން ނިންމަވައިފިއެވެ.
މިޔަންމާގައި ހަރަކާތްތެރިވެވަޑައިގަންނަވާ އދ ގެ ރެޒިޑެންޓް ކޯޑިނޭޓަރ ރެނަޓާ ލޮކް-ޑެސެލިއެން، އޮކްޓޯބަރ މަސް ނިމޭއިރު މިޔަންމާ ދޫކުރައްވާ ވަޑާއިގަންނަވަން ނިންމެވިއިރު، އެކަމަނާގެ އޮފީހުން ނެރުނު ބަޔާނެއްގައި ބުނެފައިވަނީ އޮކްޓޯބަރު މަހުގެ ނިޔަލަށް އެކަމަނާ މިޔަންމާގައި މަޑުކުރައްވާނެ ކަމަށާއި އެއަށްފަހު އދ ގެ ހެޑްކުއާޓަރުގައި އެހެން މަސައްކަތަކާއި ހަވާލުވެވަޑައިގަންނަވާނެ ކަަމަށެވެ.
މިޔަންމާގައި ހަރަކާތްތެރިވާ އދ ގެ ރެޒިޑެންޓް ކޯޑިނޭޓަރު ރެނަޓާ ލޮކް-ޑެސެލިއެން މިޔަންމާ ދޫކުރައްވާ ވަޑައިގަންނަވަން އުޅުއްވާ ކަން މިއަހަރުގެ ކުރީކޮޅުވެސް ހާމަކުރައްވާފައިވެއެވެ. އެހެންނަމަވެސް އެކަމަނާ މިޔަންމާ ދޫކޮށް ވަޑައިނުގެންނެވީ، އދ އިން އެކަމަނާގެ ބަދަލުގައި ދެން ވަޑައިގަންނަވަން އުޅުއްވި ބޭފުޅާގެ ނަން މިޔަންމާ އިން ރިޖެކްޓް ކުރުމާ ގުޅިގެންނެވެ.
ގިނަ ބަޔަކު އުންމީދުކޮށްގެން ތިބީ މިޔަންމާއަށް ދެން ވަޑައިގަންނަވާ ރެޒިޑެންޓް ކޯޑިނޭޓަރުގެ ނަންފުޅު މިޔަންމާއިން އެޕްރޫވް ނުކުރަނީސް، ރެނަޓާ ލޮކް-ޑެސެލިއެން މިޔަންމާ ދޫކޮށް ވަޑައިނުގަންނަވާނެ ކަމަށެވެ. ރެނަޓާ ލޮކް-ޑެސެލިއެން ގެ އޮފީހުން ދެން ވަޑައިގަންނަވާނެ ރެޒިޑެންޓް ކޯޑިނޭޓަރު ނަން ހާމަކޮށްފައެެއް ނުވެއެވެ.
އޯގަސްޓް މަހު ފަހުކޮޅުން ފެށިގެން މިޔަންމާގެ އަސްކަރިއްޔާ އިން ވަނީ މިޔަންމާގެ ރޮހިންޖާ މުސްލިމުންނާ ދެކޮޅަށް އާ އޮޕަރޭޝަނެއް ފަށާފައެވެ. މިޔަމަންމާގެ މުސްލިމުންނާ ދެކޮޅަށް އެގައުމުގެ ސަރުކާރުން ބާރުދީގެން، އަސްކަރިއްޔާއިން ދަނީ ބާރުގެ ބޭނުންކޮށް، މުސްލިމުން ގެދޮރުން ފައްސާލައި، ބައެއް މީހުން މަރައި، އަދި އަންހެން ކުދިންގެ އިއްފަަތް ފޭރިގަންނަމުންނެވެ. މިޔަންމާގެ އަސްކަރިއްޔާއިން ފަށާފައިވާ އޮޕަރޭޝަނާ ބެހޭ ގޮތުން އދ. އިން ބުނެފައި ވަނީ އެއީ "ނަސްލެއް ނައްތާލުމުގެ" އޮޕަރޭޝަނެއް ކަމަށެވެ. އޯގަސްޓް މަހު ފަހުކޮޅުން ފެށިގެން މިޔަންމާގެ އަސްކަރިއްޔާ އިން ހިންގާ ލާއިންސާނީ އަމަލުތަކުން ސަލާމަތްވުމަށް މިހާތަނަށް 500،000 އަށް ވުރެ ގިނަ ރޮހިންޖާ މުސްލިމުން ބަންގްލަދޭޝްއަށް ހިޖުރަ ކޮށްފައިވެއެވެ.
