އިޒްރޭލާއި އިދިކޮޅު ވިސްނުން ގެންގުޅޭކަމަށް ބުނެ އދގެ ތައުލީމާއި ސައިންސާއި ސަގާފަތާއި ބެހޭ ޖަމްއިއްޔާ ޔުުނެސްކޯއިން ވަކިވާން ނިންމައިފިއެވެ.

އެމެރިކާގެ ޚާރިޖީ ވުޒާރާގެ ތަރުޖަމާން ހެދަރ ނައުއާރޓް ވިދާޅުވީ ޕެރިހުގައި ހުންނަ ޔުނެސްކޯގެ އޮފީހުގައި އެޤައުމު ތަމްސީލްކުރުން ނިމުމަކަށް އައީކަމަށެވެ. އެމެރިކާއިން ޔުނެސްކޯއިން ވަކިވާން ނިންމި އިރު، ޔުނެސްކޯގެ މެމްބަރު ޤައުމެއްގެ ދަރަޖަ 2011ވަނަ އަހަރު ފަލަސްތީނަށް ދިނުމާއި ގުޅިގެން އެމެރިކާއިން ވަނީ އެޖަމާޢަތަށް ފައިސާ ދިނުން ހުއްޓާލާފައެވެ. އެހެން ނަމަވެސް އެޖަމާޢަތުން ވަކިވާން ކުރިން ނިންމާފައެއްނުވެއެވެ.

އެމެރިކާގެ މި ނިންމުމާއި ގުޅޭ ގޮތުން ޔުނެސްކޯގެ ޑިރެކްޓަރ ޖެނެރަލް އައިރީނާ ބޮކޯވާ ވިދާޅުވީ އެމެރިކާގެ މިނިންމުމާއި މެދު ކަންބޮޑުވެވަޑައިގަންނަވާ ކަމަށާއި، މިއީ އެމެރިކާއަށް ޔުނެސްކޯ މުހިއްމު، އަދި ޔުނެސްކޯއަށް އެމެރިކާ މުހިއްމު ދަނޑިވަޅެއް ކަމަށެވެ.

އެމެރިކާގެ ނިންމުމަށް ފާޑުކިޔާ ފަރާތްތަކުން ބުނީ ޔުނެސްކޯއިން އިސްރާއީލް-ފަލަސްތީން މައްސަލައިގައި ވަކިއަތަކަށް ޖެހިފައިވާ ކަމަށް ބުނެ އެމެރިކާއިން ޔުނެސްކޯއިން ވަކިކުމަކީ އެމައްސަލައިގައި އެމެރިކާ ވެސް ވަކިއަތަކަށް ޖެހިފައިވާކަމުގެ ހެއްކެއް ކަމަށެވެ.