އ.ދ ގެ މައި އިދާރާގައި އޮކްޓޯބަރު މަހު 11 ވަނަ ދުވަހު ބޭއްވުނު ބައްދަލުވުމަކަށް ރޮބޮޓެއް ބައިވެރިވެއްޖެއެވެ.
އިންސާނެއްގެ ސިފަ އަށް ހަދާފައިވާ އަދި އިންސާނެއްގެ އިސްކޮޅާ ރޫފަ އަށް ފެތޭ ގޮތަށް ފެންނަ މި ރޮބޮޓްގެ ނަމަކީ ސޯފިއާ އެވެ.
ދެމެހެއްޓެނިވި ތަރައްގީއާ ބެހޭ ގޮތުން ބޭއްވުނު މި ބައްދަލުވުމުގެ މައުޟޫއަކީ "ދަ ފިއުޗަރ އޮފް އެވްރީތިންގ، ސަސްޓެއިނަބަލް ޑިވެލޮޕްމަންޓް އިންދަ އޭޖް އޮފް ރެޕިޑް ޓެކްނޮލޮޖިކަލް ޗޭންޖް" އެވެ.
ސޯފިއާ ވަނީ ބައްދަލުވުމަށް ހާޒިރުވެ އ.ދ ގެ ޑެޕިއުޓީ ސެކްރެޓަރީ ޖެނެރަލް އާމިނާ މުހައްމަދު އާ ބައްދަލުކޮށް ވާހަކަ ދައްކާފައެވެ.
ދުނިޔޭގެ އެތައް ކަންކޮޅުތަކެއްގައި ދިރިއުޅެމުންދާ އެތައް ބަޔަކަށް އިންޓަރނެޓާއި ކަރަންޓު ނުލިބުމުގެ މައްސަލައިގައި އ.ދ އަށް ކުރެވޭނީ ކޮން ކަމެއްތޯ ޑެޕިއުޓީ ސެކްރެޓަރީ ޖެނެރަލް އެއްސެވުމުން ސޯފިއާ ބުނީ ވަސީލަތްތައް އެބަހުރި ކަމަށާއި، ނަމަވެސް ވަސީލަތްތައް ބެހިފައިވަނީ ހަމަހަމަ ގޮތެއްގައި ނޫން ކަމަށެވެ.
ސޯފިއާ އަކީ ހޭންސަން ރޮބޮޓިކްސްގެ އެންމެ ޒަމާނީ އުފެއްދުމެވެ. ސޯފިއާ މީގެ ކުރިންވެސް ވަނީ އިވެންޓްތަކުގައި ބައިވެރިވެ، ނޫސްވެރިންގެ ސުވާލުތަކަށް ޖަވާބު ދީފައެވެ. މީގެ އިތުރުން ކޮންސެޓް ތަކުގައިވެސް ބައިވެރިވެފައިވެެއެވެ.
