ފަލަސްތީނުގެ ސިޔާސީ ޕާޓީތައް ކަމަށްވާ ހަމާސްއާ ފަތަހަ އިން ރީކޮންސިލިއޭޝަނަކަށް ދިއުމަށް މިސްރުގެ ވެރިރަށް ގާހިރާގައި އަންގާރަ ދުވަހު ވާހަކަތައް ފަށައިފިއެވެ.
މި ވާހަކަތައް ފެށިފައި މިވަނީ ފަލަސްތީނުގެ ބޮޑުވަޒީރު ރަމީ ހަމްދަﷲ ،ހިސާރު ކުރެވިފައިވާ ޣައްޒާގެ ހިންގުމުގެ ޒިންމާ ހަމާސްގެ އަތުން ނެގުމަށްފަހު ބައިނަލްއަޤްވާމީ ފަރާތްތަކުން ބަލައިގަންނަ ސަރުކާރަކާ ހަވާލުކުރުމުގެ މަރުހަލާތައް ފަށްޓަވައިދެއްވުމަށް ޣައްޒާއަށް ވަޑައިގެންނެވިތާ ހަފްތާއެއް ފަހުންނެވެ.
ގާހިރާގައި ކުރިޔަށްދާ ބައްދަލުވުމުގައި މައިގަނޑު ކަމަކަށް އޮތީ 10 އަހަރުވީ ސިޔާސީ ދެބަސްވުން ނިމުމަކަށް ގެނައުމުގެ އުއްމީދުގައި ސިޔާސީ ޕާޓީތަކުގެ މެދުގައި 2011 ވަނަ އަހަރުވީ ގާހިރާ އެއްބަސްވުން ތަންފީޒު ކުރުމެވެ.
ހަމާސްގެ ވަފްދުގެ އިސްވެރިޔަކަށް އެ ޕާޓީގެ ޕޮލިޓިކަލް އޮފީހުގެ ވެރިޔާ ސާލިހް އަލް-އަރޫރީ ހުންނެވި އިރު ފަތަހްގެ ވަފްދުގެ ވެރިޔަކަށް ހުންނެވީ ފަތަހް ސެންޓްރަލް ކޮމިޓީގެ މެމްބަރު އައްޒާމް އަލް އަހުމަދުއެވެ.
ހިފާފައިވާ ހުޅަނގު އައްސޭރީގައި ހުރި ހަމާސްގެ މެމްބަރެއް ކަމަށްވާ ހަސަން ޔޫސުފް ވިދާޅުވީ ވާހަކަތަކުގައި ބައިވެރިވުމަށް އުރުދުން މަގުން ގާހިރާއަށް ދާން އުޅުނު ވަފްދު އިސްރާއީލުން ހިފެހެއްޓި ކަމަށެވެ.
ހަމާސް ވަފްދުގެ މެމްބަރެއް ކަމަށްވާ ޚަލީލް އަލް-ހަޔާ ވިދާޅުވީ އެ ވަފްދުން ޕަލަސްތީނުގެ ހުރިހާ ސިޔާސީ ޕާޓީއެއް އެކުލެވޭ ގޮތުން ގައުމީ އެއްބައިވަންތަކަމުގެ ސަރުކާރެއް އެކުލަވާލުމަށް މަޝްވަރާ ކުރައްވާނެ ކަމަށާއި އަދި ރިޔާސީ އިންތިޚާބާއި ގާނޫނުހަދާ މަޖިލީހުގެ އިންތިޚާބުގެ އިތުރުން ކައުންސިލް އިންތިޚާބަށް ތައްޔާރުވުމާ ބެހޭގޮތުން މަޝްވަރާ ކުރާނެ ކަމަށެވެ. ހަޔާ ވިދާޅުވީ މަޝްވަރާތަކުގައި އަމާޒު ހިފާނީ އިދިކީލިކަން ނައްތާލުމާއި އިސްރާއީލުގެ މަޝްރޫއުތައް ހުއްޓުވުމަށްޓަކައި ފަލަސްތީނުގެ ބައިބައިވުން ނައްތާލުމަށް ކަމަށެވެ.
ގާހިރާ އެއްބަސްވުމުގައިވާ ގޮތުން ރިޔާސީ އިންތިޚާބާއި ގާނޫނުހަދާ މަޖިލީހުގެ އިންތިޚާބުގެ އިތުރުން ކައުންސިލް އިންތިޚާބު އެ އެއްބަސްވުމުގައި ސޮއިކުރާތާ އެއް އަހަރު ދުވަހުގެ ތެރޭގައި ބާއްވަން ޖެހެއެވެ.
ފަތަހަ ޖަމާއަތުގެ ތަރުޖަމާން އުސާމާ އަލް-ޤަވަސްމީ ފަލަސްތީނުގެ ރަސްމީ ރޭޑިއޯގައި ވިދާޅުވީ ތިން ދުވަހަށް ދެމިގެންދާ ވާހަކަތަކުގައި އަމާޒު ހިފާނީ ޤައްޒާގައި ސިޔާސީ ހަރަކާތްތައް ހިންގައި ސަލާމަތީކަންކަން ބެލެހެއްޓުމާއި އިގްތިސާދީގޮތުން ހަރަކާތްތެރިވުމަށްޓަކައި އާއްމުކޮށް އެންމެންނަށް ބަލައިގަނެވޭ ސަރުކާރެއް އެކުލަވާލުމަށް ކަމަށެވެ.
އެޖެންޑާގައި ހިމެނޭ އެހެން ކަންކަމަށް ބަލާއިރު ޣައްޒާގެ ކަރަންޓުގެ މައްސަލަޔާއި،އައްސޭރި ފަށުގައި އޮންނަ ސަރަހައްދެއްގައި މަސައްކަތްކުރާ ޕަލަސްޓައިން އޮތޯރިޓީގެ މުވައްޒަފުންގެ މުސާރައިގެ މައްސަލަޔާއި، ސަރަހައްދީ ރޮނގު ހުރަސްކުރުމުގެ ސަލާމަތީ ކަންކަމާއި އިދާރީ ކަންކަން ހިމެނެއެވެ.
