އަންނަ އަހަރު ރަޝިއާގައި ބާއްވާ ފީފާ ވޯލްޑް ކަޕުން ފްރާންސް ޖާގަ ހޯދައިފި އެވެ.

ފީފާ ވޯލްޑް ކަޕުން ފްރާންސް ޖާގަ ހޯދީ ޔޫރޯ ޒޯންގެ ކޮލިފިކޭޝަން ގްރޫޕް އޭގައި އަންގާރަ ދުވަހުގެރޭ ބެލާރޫސް އަތުން ހޯދި ތިން ޕޮއިންޓާއެކު ގްރޫޕްގެ އެއްވަނަ މަގާމް ކަށަވަރު ކޮށްގެންނެވެ.

އަންގާރަ ދުވަހުގެރޭ އަމިއްލަ ދަނޑުގައި ބެލާރޫސްގެ މައްޗަށް ފްރާންސް ކުރިހޯދީ ދެ ލަނޑު ސުން ލަނޑުންނެވެ.

މިމެޗުގެ 27 ވަނަ މިނެޓުގައި ފްރާންސަށް ކުރި ހޯދައިދިނީ އެތުލެޓިކޯ މެޑްރިޑްގެ ފޯވާޑް އެންޓޮއިން ގްރިޒްމަން އެވެ. އޭގެ ހަ މިނެޓު ފަހުން ފްރާންސަށް ލީޑު ފުޅާ ކޮށްދިނީ އާސެނަލްގެ ފޯވާޑް އޮލިވިއޭ ޖިރޫ އެވެ.

ފުރަތަމަ ހާފް ނިމެން މިނެޓަކަށް ވެފައިވަނިކޮށް ބެލާރޫސް އަށް ސުން ކަނޑުވާލައިދިނީ އެންޓަން ސަރޯކާ އެވެ.

މިމޮޅާއެކު މިގްރޫޕްގެ އެއްވަނަ ފްރާންސް ހޯދީ 10 މެޗުން 23 ޕޮއިންޓް ހަމަކޮށްގެންނެވެ. ގްރޫޕް އޭގެ ކުޅުން ނިމިފައިވާއިރު، ފްރާންސް އަތުން ބަލިވި ބެލާރޫސް އޮތީ ފަސް ޕޮއިންޓާއެކު ޕޮއިންޓް ތާވަލްގެ ފުލުގައެވެ.

މިގްރޫޕްގައި އެންމެ ހިތްދަތި ގޮތަކަށް ކޮލިފައިންގ ނިންމާލި ޓީމަކީ ނެދަލެންޑްސް އެވެ. ކޮލިފައިންގެ ފަހު މެޗުގައި ސްވިޑްންގެ މައްޗަށް ނެދަލެންޑްސް ކުރިހޯދި ނަމަވެސް، ޕޮއިންޓްގެ ގޮތުން ދެޓީމް އެއްވަރުވެ، ފައިދާ ގޯލުގެ ތަފާތުން ޕްލޭއޯފްގެ ޖާގަ ލިބިފައިވަނީ ސްވިޑްން އަށެވެ. ސްވިޑްން އަށް ފައިދާ 17 ލަނޑު އޮތްއިރު، ނެދަލެންޑްސަށް ލިބިފައިވަނީ ފައިދާ ނުވަ ލަނޑެވެ.

އަންގާރަ ދުވަހުގެރޭ އަމިއްލަ ދަނޑުގައި ސްވިޑްންގެ މައްޗަށް ނެދަލެންޑްސް ކުރިހޯދީ ދެ ލަނޑު ސުން ލަނޑުންނެވެ. މިމެޗުގެ ފުރަތަމަ ހާފްގައި ނެދަލެންޑްސްގެ ދެލަނޑުވެސް ޖަހައިދިނީ ބަޔާން މިއުނިކްގެ މިޑްފީލްޑަރ އާޔެން ރޮބެން އެވެ. ނެދަލެންޑްސްގެ ފުރަތަމަ ލަނޑު ރޮބެން ޖަހައިދިނީ ލިބުނު ޕެނަލްޓީ އަކުންނެވެ.

މިގްރޫޕްގައި ލަކްޒަމްބާގާއި ބަލްގޭރިއާ ބައްދަލުކުރި މެޗު ނިމުނީ އެއް ލަނޑު އެއް ލަނޑުން އެއްވަރު ވެގެންނެވެ.

މިމެޗުތަކާއެކު ގްރޫޕް އޭގެ ކުޅުން ނިމުނުއިރު، ގްރޫޕްގެ ދެވަނަ ހޯދައި ޕްލޭ އޯފްގެ ޖާގަ ހޯދި ސްވިޑްން އާއި ތިންވަނަ ލިބުނު ނެދަލެންޑްސް އަށްވެސް ލިބިފައިވަނީ 19 ޕޮއިންޓެވެ. ހަތަރުވަނާގައިވާ ބަލްގޭރިއާ އަށް 13 ޕޮއިންޓް ލިބިފައިވާއިރު، ލަކްޒަމްބާގަށް ލިބިފައިވަނީ 6 ޕޮއިންޓެވެ. ގްރޫޕްގެ ފުލުގައިވާ ބެލާރޫސް އަށް ލިބިފައިވަނީ 5 ޕޮއިންޓެވެ.