ވޯލްޑް ކަޕް ކޮލިފައިންގައި ވޭލްސް އަށް ފުރުސަތު ގެއްލުނުއިރު، އަޔަލޭންޑް ޕްލޭއޮފްގެ ޖާގައެއް ކަށަވަރުކޮށްފިއެވެ.

ހޯމަ ދުވަހުގެ ރޭ ކުޅުނު މެޗު ވޭލްސްއާ ވާދަކޮށް، އަޔަލޭންޑް މެޗު ކާމިޔާބުކުރީ 0-1 ގެ ނަތީޖާއަކުންނެވެ.

ވޭލްސް ދަނޑުގައި ކުޅުނު މި މެޗު ފެށިގެން ބޯޅަ ކޮންޓްރޯލް ކޮށްގެން ރަނގަޅަށް ކުޅުނީ އެޓީމުންނެވެ. އެގޮތުން އެޓީމުން ވަނީ އަޔަލޭންޑްގެ ހާފަށް ބާރުބޮޑުކޮށް ގިނަ ހަމަލާތަކެއް ފޮނުވާލާފައެވެ.

އެހެންނަމަވެސް ފުރަތަމަ ހާފްގެ ވަކި ހިސާބަކުން އަޔަލޭންޑް އިން ވަނީ މެޗުގެ ތެރެއަށް މަޑުމަޑުން ވަދެ، ކޮންޓްރޯލް ހޯދާފައެވެ. އެގޮތުން އެޓީމުން ވަނީ ވޭލްސްގެ ގޯލަށް ނުރައްކާ ކުރުމަށް މަސައްކަތްކޮށްފައެވެ.

ފުރަތަމަ ހާފް ނިމުނީ 0-0 ގެ ނަތީޖާއިން ދެޓީމު އެއްވަރުވެގެންނެވެ.

ދެވަނަ ހާފް ފެށިގެން މާގިނައިރުތަކެއް ނުވަނީސް އަޔަލޭންޑް އިން ވަނީ ލަނޑު ޖަހާ މެޗުގެ ލީޑު ނަގާފައެވެ. މި ލަނޑު 57 ވަނަ މިނެޓުގައި އެޓީމަށް ކާމިޔާބުކޮށްދިނީ މެކްލީންއެވެ.

މި ލަނޑަށްފަހު އަޔަލޭންޑް އިން ވަނީ ފަހަތަށް ޖެހި މޮޅު ޑިފެންސެއްކޮށް، ވޭލްސްގެ ގިނަ ހަމަލާތަކެއް ދިފާއުކޮށްފައެވެ.

މި ނަތީޖާއާއެކު އަޔަލޭންޑް ވަނީ އެޓީމު ހިމެނޭ ގްރޫޕް ޑީގައި ކުޅުނު 10 މެޗުން 19 ޕޮއިންޓް ހަމަކޮށް، ދެވަނަ ހޯދާފައެވެ. ވޭލްސް އަށް 10 މެޗުން ލިބުނީ 17 ޕޮއިންޓެވެ. ގްރޫޕްގެ މެޗުތައް ކުޅެނިމިފައިވާއިރު، ވޭލްސް އަށް ލިބުނީ ތިންވަނައެވެ. ގްރޫޕްގެ އެއްވަނައަށް ވޯލްޑްކަޕުން ފުރުސަތު ލިބޭއިރު، ދެވަނަ އަށް ޕްލޭއޮފްގެ ފުރުސަތު ލިބޭނެއެވެ. މިގްރޫޕްގެ އެއްވަނަ މަގާމާއެކު ފީފާ ވޯލްޑް ކަޕްގެ ޖާގަ ކަށަވަރު ކޮށްފައިވަނީ ސާބިއާ އެވެ.