ޗެލްސީ އަށް ކުޅެމުން އަންނަ ފްރާންސްގެ މިޑްފިލްޑަރު އެންގޯލޯ ކަންޓޭ އަށް އަނިޔާވެ އަނެއްކާ ވެސް ކުޅުމާ ދުރަށް ދާންޖެހިއްޖެއެވެ.

ކަންޓޭ އަށް އަނިޔާވީ ވޯލްޑްކަޕް ކޮލިފައިންގައި ބަލްގޭރިއާއާ ދެކޮޅަށް ފްރާންސް ކުޅުނު މެޗުގައެވެ. މެޗު ފެށިގެން 34 ވަނަ މިނެޓުގައި ކަންޓޭގެ ފަލަމަސްގަނޑަށް ލިބުނު އަނިޔާއާއެކު އޭނާ ވަނީ ބަދަލު ކޮށްފައެވެ.

ކަންޓޭ އަށް ލިބުނު އަނިޔާއާއެކު އޭނާ ކުޅުމާ ދުރަށްދާން ޖެހޭނެ މުއްދަތު އަދި ކަށަވަރެއް ނުވެއެވެ. އެހެން ނަމަވެސް ރިޕޯޓްތައް ބުނާގޮތުން އިންޓަނޭޝަނަލް ބްރޭކަށް ފަހު އޭނާ ފިޓްވާނެކަމާމެދު ސުވާލު އުފެދެއެވެ.

ޕްރިމިއާ ލީގުގައި ޗެލްސީ މި މަހު 14 ވަނަ ދުވަހު ކްރިސްޓަލް ޕްލަސްއާ ދެކޮޅަށް ނިކުންނައިރު، އެޓީމުގެ ބައެއް މުހިންމު ކުޅުންތެރިންނަށް ކުޅެވޭނެކަމާމެދު ވަނީ ސުވާލު އުފެދިފައެވެ. އޭގެ ތެރޭގައި ފޯވާޑް އަލްވަރާ މޮރާޓާ އަދި ޑްރިންކް ވޯޓާ ހިމެނެއެވެ.

އިނގިރޭސި ކްލަބް ލެސްޓާ ސިޓީން މުޅިން އަލަށް ޕްރެމިއާ ލީގަށް ކޮލިފައިވެ ރެކޯޑަކާ އެކު ލީގު ކާމިޔާބު ކުރުމުގައި މުހިންމު ދައުރެއް އަދާކުރުމަށް ފަހު ކަންޓޭ ޗެލްސީ އަށް ބަދަލުވެފައި ވަނީ ފާއިތު ސީޒަނުގައި 30 މިލިއަން ޕައުންޑްގެ އަގަކަށެވެ. އަދި އޭނާ ވަނީ ޗެލްސީގައި މޮޅު ކުޅުމެއް ދައްކައި ލީގު ކާމިޔާބު ކުރުމުގައި މުހިންމު ދައުރެއް އަދާކޮށްފައެވެ. މީގެ އިތުރުން އޭނާ ވަނީ ފާއިތުވި ސީޒަނުގެ ޕްރެމިއާ ލީގުގެ އެންމެ މޮޅު ކުޅުންތެރިޔާގެ މަގާމު ވެސް ހޯދާފައެވެ.

އުމުރުން 26 އަހަރުގެ ކަންޓޭ ވަނީ ޗެލްސީއަށް އޭނާ ކުޅުނު 51 މެޗުގައި ތިން ލަނޑު ކާމިޔާބު ކޮށްދީފައެވެ. ފްރާންގެ ގައުމީ ޓީމަށް މިހާތަނަށް ކުޅުނު 17 މެޗުގައި އޭނާ ވަނީ އެއް ލަނޑު ކާމިޔާބު ކޮށްދީފައެވެ.