ބަންގްލަދޭޝްގައި ރޮހިންޖާ މުސްލިމުންނަށް ގާއިމް ކުރާ ދުނިޔޭގެ އެންމެ ބޮޑު ރެފިއުޖީ ކޭމްޕް ގާއިމްވެގެން ދިއުމަކީ މީހުން ތޮއްޖެހި އޭގެ ސަބަބުން ނުރައްކާތެރި ބަލިތައް އަވަހަށް ފެތުރިގެން ހިނގައިދާނެފަދަ ނުރައްކާތެރި ކަމެއް ކަމަށް އދ ގެ އިސް އޮފިޝަލަކު ވިދާޅުވެއްޖެ އެވެ.
ބަންގްލަދޭޝްއިން ރޮހިންޖާ މުސްލިމުންނަށް އަޅަން ނިންމާފައިވާ ރެފިއުޖީ ކޭމްޕަކީ 800،000 އަށް ވުރެ ގިނަ މީހުން ބޯހިޔާވަހިކަން ދޭން ގާއިމް ކުރާ ކޭމްޕެކެވެ. މިޔަންމާގެ އަސްކަރިއްޔާއިން އޯގަސްޓް މަހުގެ 25 ވަނަ ދުވަހުން ފެށިގެން ރަޚައިން ސްޓޭޓްގައި ހިންގަމުންދާ އޮޕަރޭޝަންގެ ސަބަބުން މިޔަންމާ ދޫކޮށް ބަންގްލަދޭޝްއަށް ހިޖުރަ ކުރި ފަރާތްތައް މިހާރުވެސް ވަނީ ކޭމްޕްތަކުގައި ތޮއްޖެހިފައެވެ.
ރެފިއުޖީންގެ ސަބަބުން އުދަނގޫތައް ކުުރިމަތިވެފައިވާ ބަންގްލަދޭޝްގެ ސަރުކާރުން ވަނީ ސަރަހައްދީ ރޮނގުގެ ކައިރީގައިވާ ކޮކްސް ބާޒާރުގެ ކުޓުޕަލޮންގ ގައި ރޮހިންޖާ ރެފިއުޖީންނަށް ގާއިމްކޮށްފައިވާ ކޭމްޕް ބޮޑު ކުރުމަށް ރާވާފައެވެ. ނަމަވެސް ޑާކާގައި ހުންނަވާ އދގެ ރެޒިޑެންޓް ކޯޑިނޭޓަރ ރޮބަރޓް ވަޓްކިންސް އޭއެފްޕީގައި ވިދާޅުވީ އެ ތަނުގެ ބަދަލުގައި އިތުރު އާ ކޭމްޕްތައް ގާއިމް ކުރުމަށް އެ ގައުމުން އެހެން ސަރަހައްދުތަކެއް ބަލަން ޖެހޭ ކަމަށެވެ.
"ކުޑަކުޑަ ސަރަހައްދަކަށް އެތައް ބަޔަކު ލުމަށް ވިސްނާއިރު، ވަކިން ޚާއްސަކޮށް ބަލިތަކަށް އެހާ ނާޒުކު މީހުން، އެއީ ވަރަށް ނުރައްކާ ކަމެއް" ވަޓްކިންސް އޭއެފްޕީއަށް ވިދާޅުވިއެވެ. "ވަރަށް ބޮޑު ފުރުސަތެއް އެބަ އޮތް ގައިންގަޔަށް އަރާ ބައްޔެއް އުޅޭނަމަ އެ ބައްޔެއް ފެތުރުން،ވަރަށް އަވަހަށް ފެތުރޭނެ" އަލިފާނުގެ ހާދިސާތަކުގެ ރިސްކުވެސް އޮތް ކަމަށް ވިދާޅުވެ އޭނާ ވިދާޅުވިއެވެ.
އޭނާ ވިދާޅުވީ އެއް ކޭމްޕަކަށްވުރެ ބޮޑަށް އެކި ކޭމްޕް ތަކުގައި މީހުން ތިބުމުން މީހުންގެ ކަންކަން ހަމަ ޖެއްސުމާއި ބަލިތައް ފެތުރުން ފަދަ ކަންކަން ކުޑަކޮށް ސަލާމަތީ ކަންކަން ބަލަހައްޓަންވެސް ފަސޭހެވެގެންދާނެ ކަމަށެވެ. ޑާކާއިން އެދުނުގޮތަށް އދގެ އިންޓަރނޭޝަނަލް އޯގަނައިޒޭޝަން ފޮރ މައިގްރޭޝަންއިންވަނީ އެހީދޭ ފަރާތްތަކަށް އެއްބާރުލުން ދީ އާ ކޭމްޕް ތަކުގައި ބޯހިޔާވަހިކަން ގާއިމް ކޮށްދިނުމަށް އެހީތެރިވުމަށް އެއްބަސްވެފަައެވެ.
މިއީ ޔުގާންޑާއާ ކެންޔާއަށްފަހު ދުނިޔޭގައި ގާއިމްވާ އެންމެ ބޮޑު ރެފިއުޖީ ކޭމްޕްކަމަށް އިންޓަރނޭޝަނަލް އޯގަނައިޒޭޝަން ފޮރ މައިގްރޭޝަނުން ބުނެއެވެ. އެއިން ކޮންމެ ގައުމެއްގައިވެސް 300،000 ރެފިއުޖީން ދިރި އުޅޭ ކޭމްޕެއް އޮވެއެއެވެ.
