ސީރިއާގެ އުތުރުގައި އިދިކޮޅު ހަނގުރާމަވެރިންގެ ބާރުގެ ދަށުގައިވާ ލަތަމްނާގައި ކެމިކަލް ހަތިޔާރުގެ ބޭނުން ކޮށްފައިވާކަން ކެމިކަލް ހަތިޔާރާއި ދެކޮޅަށް މަސައްކަތް ކުރާ ބައިނަލްއަޤްވާމީ ޖަމާއަތުގެ ތަހުގީގުން ހާމަވެއްޖެ އެވެ.

އޯގަނައިޒޭޝަން ފޯ ދި ޕްރޮހިބިޝަން އޮފް ކެމިކަލް ވެޕަންސް (އޯޕީސީޑަބްލިއު)ގެ ތަހުގީގު ރިޕޯޓާއި ހަވާލާދީ އަލްޖަޒީރާ އިން ބުނީ، އެޖަމާއަތުގެ ހަނގުރާމަވެރިންނަށް ސީރިއާގައި ކެމިކަލް ހަތިޔާރުގެ ބާވަތެއް ކަމަށްވާ ސެރިން ނުވަތަ ސެރިން އާއި ގުޅުން ހުރި ކެމިކަލްގެ އަސަރު ފެނިފައިވާ ކަމަށެވެ.

އެޖަމިއްޔާގެ ތަހުގީގަށް ފާހަގަވި ކަންކަން، އެޖަމާއަތުގެ މެމްބަރު ޤައުމުތަކާއި ބުދަ ދުވަހު ހިއްސާކޮށްފައިވާއިރު، ސީރިއާގައި ސެރިންގެ ހަމަލާ ދީފައިވަނީ މިދިޔަ މާޗް މަހުގެ 30 ވަނަ ދުވަހު ކަމަށް އެޖަމިއްޔާ އިން ބުނެ އެވެ.

މާޗް މަހު ސީރިއާގެ ހަމާ ޕްރޮވިންސްގައި ދިން ކެމިކަލް ހަމަލާގައި ފަންސާސް މީހުން ޒަޚަމްވެފައިވާ ކަމަށް ރިޕޯޓްތައް ބުނެއެވެ.

ސީރިއާގެ އިދްލީބްގައި ޤާއިމް ވެފައިވާ އެކްޓިވިސްޓް މަޖީދު އަލް ނޫރު އަލްޖަޒީރާ އަށް ބުނީ، ކެމިކަލް ހަތިޔާރު ބޭނުން ކުރުމަކީ އެޤައުމުގައި ދޭތެރެ ދޭތެރެއިން ހިނގާ ކަމެއް ކަމަށެވެ.

އަދި ސީރިއާގައި ދޭ ވައިގެ ހަމަލާތަކުގައި ކެމިކަލް ބޭނުން ކުރާކަން އާއްމުންނަށް އެނގެނީ، ހަމަލާ އަށްފަހު އެކަމުގެ އަލާމާތްތައް ފެންނަން ފެށުމުން ކަމަށް އޭނާ ބުންޏެވެ.

ލަތަމްނާގައި އޭގެ ކުރިންވެސް ކެމިކަލް ހަމަލާ ދީފައިވާ ކަމަށް ރިޕޯޓްތައް ބުނެއެވެ. އެގޮތުން މީގެ ފަސް ދުވަސް ކުރިން ދިން ހަމަލާއެއް އެޤައުމުގެ ހަސްފަތާލަކަށް އަމާޒުވިއިރު، އެހަމަލާގައި ޑޮކްޓަރަކާއި ބަލި މީހަކު މަރުވެފައިވާ ކަމަށް ޚަބަރު ލިބެއެވެ.

މީގެ އިތުރުން އޭޕްރީލް މަހުގެ 4 ވަނަ ދުވަހު ހަނގުރާމަވެރިންގެ ބާރުގެ ދަށުގައިވާ އިދްލީބްގެ ޚާން ޝެއިޚޫން އަވަށަށް ސީރިއާ ސަރުކާރުގެ ފައުޖުތަކުން ދިން ހަމަލާއެއްގައި މަނާކޮށްފައިވާ ނާވް އޭޖެންޓެއް ބޭނުން ކޮށްފައިވާ ކަމަށް ރިޕޯޓްތައް ބުނެއެވެ. އެހަމަލާގައި 87 މީހަކު މަރުވެފައިވާއިރު، މިދިޔަ މަހު އދ.ގެ ތަހުގީގު ޓީމުން ވަނީ އެހަމަލާގައި ސެރިން ގޭސް ބޭނުން ކޮށްފައިވާ ކަމަށް ބެލެވޭ ކަން ހާމަކޮށްފައެވެ.

ސީރިއާގެ ސަރުކާރުން އަންނަނީ ކެމިކަލް ބޭނުން ކޮށްގެން ހަމަލާ ދިނުމުގައި ސަރުކާރުގެ ފައުޖުތައް ބައިވެރިވާ ކަމަށް ކުރާ އެތުހުމަތުތަކަށް ދެކޮޅު ހަދަމުންނެވެ. އަދި 2013 ވަނަ އަހަރުގެ އެއްބަސްވުމުގެ ފަހުން ސީރިއާގައި ކެމިކަލް ހަތިޔާރު އުފެއްދުން ހުއްޓާލާފައިވާ ކަމަށް ސީރިއާ ސަރުކާރުން ބުނެއެވެ. ހަނގުރާމާގައި ކެމިކަލް ހަތިޔާރު ބޭނުން ކުރުމަކީ ބައިނަލްއަޤްވާމީ ޤާނޫނު ތަކުގެ ދަށުން މަނާ ކަމެކެވެ.

ޚާން ޝެއިޚޫންގައި ދިން ހަމަލާއަށްފަހު އެމެރިކާ އިން ވަނީ ސީރިއާގެ ރައީސް ބައްޝާރުލް އަސަދު ޖަވާބުދާރީ ކުރުވަން ޖެހޭ ކަމަށް ބުނެފައެވެ.

މީގެ އިތުރުން އދ އިން ނެރުނު ރިޕޯޓެއްގައި ވަނީ، 2013 ވަނަ އަހަރުގެ މާޗް މަހުގެ ފަހުން ސީރިއާގެ އިދްލިބް ޕްރޮވިންސާއި، ހަމާ ޕްރޮވިންސް އަދި އިރުމަތީ ގޫތާގައި ސަރުކާރުގެ ފައުޖުތަކުން ކެމިކަލް ބޭނުން ކޮށްގެން 23 ހަމަލާއެއް ދީފައިވާ ކަން ފާހަގަކޮށްފައެވެ.