ޓެރަރިޒަމްގެ އަމަލުތައް ސްޕޮންސާ ކުރާ ދައުލަތްތަކުގެ ލިސްޓަށް އުތުރު ކޮރެޔާ ލުމަށް، އުތުރު ކޮރެޔާގެ ޖަލެއްގައި ބަންދުގައި ބެހެއްޓުމަށްފަހު ދޫކޮށްލިތަނާ މަރުވެފައިވާ އެމެރިކާގެ ޒުވާނާ އޮޓޯ ވާމްބިއާގެ މައިންބަފައިން އެމެރުކާ ސަރުކާރަށް ގޮވާލައިފިއެވެ.
އޮޓޯ ވާމްބިއާގެ މައިންބަފައިންގެ އެދުމަކަށް މިކަން ބަޔާންކޮށް އެމެރިކާގެ ސެނެޓުގެ ބާރަ މެމްބަރަކު ވަނީ އެމެރިކާގެ ޚާރިޖީ ވަޒީރު ރެކްސް ޓިލާސަން އަށް ހުށަހަޅައިފަ އެވެ.
އެމެރިކާގެ ސްޓޭޓް ޑިޕާޓްމަންޓުން "އޭބީސީ ނިއުސް" އަށް ބުނެފައި ވަނީ ސެނެޓުގެ މެމްބަރުން ފޮނުއްވި ސިޓީ ލިބިފައިވާ ކަމަށާއި އެ ސިޓީ ރިވިއުކޮށް އެެެއަށް ޖަވާބު އަރުވާނެ ކަމަށެވެ.
ޓެރަރިޒަމްގެ އަމަލުތައް ސްޕޮންސާ ކުރާ ދައުލަތްތަކުގެ ލިސްޓުގައި މިހާރު ރަސްމީކޮށް ހިމެނެނީ ތިން ގައުމެކެވެ. އެއީ އިރާން، ސޫދާން އަދި ސީރިޔާ އެވެ.
ވާމްބިއާ ހައްޔަރުކުރީ ޓޫރިސްޓް ވިސާގައި އުތުރު ކޮރެޔާ އަށް ދިޔަ ދިއުމެއްގައި، އުތުރު ކޮރެޔާގެ ލީޑަރު، ކިމް ޖޮން އުންގެ ޕްރޮޕެގެންޑާ ފެތުރުމަށް ދަމާފައިހުރި ބެނާއެއް ވަގަށް ނެގި މައްސަލާގައެވެ. މި ދައުވާއަށް އޭނާ އިއުތިރާފް ވުމާއެކު އޭނާގެ މައްޗަށް ވަނީ "ހާޑް ލޭބާ" ގެ 15 އަހަރު ދުވަހުގެ ހުކުމެއް އިއްވާފައެވެ. ވާމްބިއާ އުތުރު ކޮރެޔާގައި، ބަންދުގައި 17 މަސް ހޭދަ ކުރިއެެެވެ.
އޮޓޯ ވާމްބިއާ ޖަލުން މިނިވަންވެ އުތުރު ކޮރެޔާ ދޫކޮށް އެމެރިކާ އަށް ދިޔަތާ ހަފްތާއެއް ވެސް ނުވަނީސް ވަނީ މަރުވެފައެވެ.
