ލަސް ވެގަސްގައި ހަމަލާދިން ސްޓެފަން ޕެޑޮކްގެ ލޯބިވެރިޔާ އެމެރިކާއަށް ގޮސްފިއެވެ.އެމެރިކާގައި ފުލުހުން އޭނާއާ ސުވާލު ކުރާނެއެވެ.

ފިލިޕީންސުން ލޮސްއެންޖެލިސްއަށް އަންގާރަ ދުވަހުގެ ރޭ، މެރިލޫ ޑެންލީ ދިއުމުން ފެޑެރަލް ފުލުހުން ވަނީ އޭނާއާ ބައްދަލު ކޮށްފައެވެ.

ރިޕޯޓްތައް ބުނާގޮތުގައި ޕެޑޮކް ވަނީ މި ހަމަލާގެ ކުރިން ފިލިޕީންސްގައި ހުރި މެރިލޫ އަށް 100،000ޑޮލަރު ފޮނުވާފައެވެ.

ބުދަ ދުވަހުގެ ވަގުތެއްގައި ރައީސް ޓްރަމްޕް ލަސް ވެގަސްއަށް ވަޑައިގަންނަވާނެއެވެ.

"ރަނގަޅު..މިއީ ވަރަށް ދެރަ ކަމެއް"ނެވާޑާއަށް ފުރާ ވަޑައިގެންނެވުމުގެ ކުރިން ވައިޓްހައުސްގައި ހުންނަވަ ނޫސްވެރިންނަށް ވިދާޅުވިއެވެ.

"އަޅުގަނޑުމެން މިދަނީ އިހުތިރާމް އަދާކޮށް އަދި ކުޑަވަގުތުކޮޅެއްގެ ތެރޭ ފުރިހަމަ މަސައްކަތްތަކެއް ކުރި ފުލުހުން ދެކިލުމަށް"

ރައީސް ޓްރަމްޕް ވަނީ ހަމަލާ ދިން މީހާއާ ބެހޭގޮތުން އިތުރު ވާހަކަތައް ވެސް އިވެމުންދާކަމަށާއި އެ ވާހަކަތައް ރަނގަޅު ވަގުތުގައި ހާމަ ކުރައްވާނެ ކަމަށް ވިދާޅުވެފައެވެ.

ޕެޑޮކް އަކީ ޖިނާއީ ކުށެއްގެ ރެކޯޑެއް ނެތް، ކުރިން އެކައުންޓެންޓެއްގެ ގޮތުގައި މަސައްކަތް ކުރުމަށް ފަހު ރިޓަޔަރ ކޮށްފައިވާ މީހެކެވެ.

އޭނާވަނީ މެންޑަލޭ ބޭ ހޮޓަލުގެ 32 ބުރީގައި އޭނާ ހުރި ކޮޓަރީގައި ހުރެ ހޮޓަލުގެ ތިރީގައި ހިނގަމުން ދިޔަ ކޮންސެޓް ބެލުމަށް ޖަމާވެ ތިބި 22،000 މީހުންގެ ތެރެއަށް ވަޒަންތައް ބުރުވާލާފައެވެ.

އޭނާ މަރުވުމުގެ ކުރިން އޭނާވަނީ ބަޑީގެ ހަމަލާގައި 58 މީހުން މަރާލައި 500 އަށްވުރެ ގިނަ މީހުން ޒަޚަމް ކޮށްލާފައެވެ.

ފުލުހުންގެ އޮފިޝަލަކާ ހަވާލާދީ ރޮއިޓާސްގައި ބުނެފައިވަނީ ޑެންލީ އިސްވެ ފުލުހުންނާ މައުލޫމާތު ހިއްސާ ކުރާނެ ކަމަށް އުއްމީދު ކުރާ ކަމަށެވެ.

މެރިލޫ ޑެންލީ އަކީ މީގެ 20 އަހަރު ކުރިން އެމެރިކާއަށް ބަދަލުވި އޮސްޓްރޭލިޔާގެ ރައްޔިތެކެވެ.

އެމެރިކާގެ އިދާރާތަކުން ވަނީ ޑެންލީއަކީ ތަހުގީގަށް ބޭނުންވާ ފަރާތެއްކަން ހާމަކޮށްފައެވެ. އަދި ހަމަލާ ދެވުނުތާ ކުޑަ ވަގުތު ކޮޅެއްގެ ތެރޭގައި ފުލުހުން އޭނާއާ ގުޅާފައިވާކަމަށްވަނީ ބުނެފައެވެ.

އެމެރިކާގެ މީޑިއާތަކުން ރިޕޯޓްކޮށްފައިވާގޮތުގައި ސެޕްޓެމްބަރު މަހުގެ ފަހުކޮޅުން ފެށިގެން އޭނާ އުޅެމުންދަނީ ފިލިޕީންސްގައެވެ.