ސްރީ ލަންކާގެ ޕާލިމެންޓަރީ ޑިމޮކްރެސީ އަށް 70 އަހަރު، އަދި މިނިވަން ދަޢުލަތެއްގެ ގޮތުގައި 60 އަހަރު ފާއިތުވެގެންދިޔައިރު، ލަންކާގެ އެއްބައިވަންތަކަން ގާއިމް ކުރުމުގައި ފެއިލް ވެފައިވާ ކަމަށް އެޤައުމުގެ ބޮޑުވަޒީރު ރަނިލް ވިކްރަމަސިންހަ ވިދާޅުވެއްޖެ އެވެ.

ސްރީލަންކާގެ ޕާލިމެންޓަރީ ޑިމޮކްރެސީ އަށް 70 އަހަރު ފުރުން ފާހަގަ ކުރުމަށް ލަންކާގެ ޤާނޫނު ހަދާ މަޖިލީހުގައި އަންގާރަ ދުވަހު ބޭއްވި ޙާއްސަ ޖަލްސާގައި ވާހަކަ ދައްކަވަމުން ބޮޑުވަޒީރު ވިދާޅުވީ، ހެޔޮނިޔަތަކާ އެކު ނަޞްލީ ހުރިހާ ގްރޫޕްތަކެއްގެ ބައިވެރިވުމާ އެކު ސްރީ ލަންކާގެ ހަޤީޤީ އައިޑެންޓިޓީއެއް ގާއިމް ކުރުމުގައި ފެއިލް ވެފައިވާ ކަމަށެވެ.

ލަންކާގައި ފަސްދޮޅަހަކަށް އަހަރަށް ދެމިގެންދިޔަ ނަޞްލީ ހަމަނުޖެހުންތަކާއި، 30 އަހަރަށް ދެމިގެންދިޔަ ނަޞްލީ ހަނގުރާމައިގެ ސަބަބަކީ އެއީކަން ފާހަގަ ކުރައްވަމުން އޭނާ ވިދާޅުވީ، 1978 ވަނަ އަހަރު ހުޅުވާލެވިފައިވާ އިޤްތިޞާދަކަށް ހުޅުވާލި ނަމަވެސް، އޭގެ ފުރިހަމަ މަންފާ ލިބިދީފައި ނުވަނީ އެސަބަބާއި ހެދި ކަމަށެވެ.

ޤައުމީ ބޮޑެތި މައްސަލަތަކުގައި ސިޔާސީ ޙައްލެއް ހޯދުމުގައި ފެއިލް ވެފައިވާތީ ހިތާމަކުރާ ކަމަށް އޭނާ ވިދާޅުވި އެވެ.

އެހެންނަމަވެސް ރަނިލް ވަނީ، 116 އަހަރުވީ ލަންކާގެ ބަރުލަމާނީ ނިޒާމުގެ ސަބަބުން އެޤައުމަށް ރަނގަޅު ކުރިއެރުންތަކެއް ލިބިފައިވާ ކަމަށް ވިދާޅުވެފައެވެ. ސްރީ ލަންކާގައި މިހާރު ވެރިކަން ކުރާ ބަރުލަމާނީ ނިޒާމް އެޤައުމަށް ތަޢާރަފް ކޮށްފައި ވަނީ 1832 ވަނަ އަހަރު އެވެ.

ލަންކާގައި ޤާނޫނު އަސާސީ ދެފަހަރެއްގެ މަތިން އެކުލަވާލާފައި ވަނީ ބަރުލަމާނީ ނިޒާމާއި ހަތްދިހަ އަހަރުވީ ޤާނޫނީ ނިޒާމުގެ ތެރެއިން ކަމަށް އޭނާ ވިދާޅުވި އެވެ. މީގެ އިތުރުން މަސްޢޫލިއްޔަތު އަދާކުރާ މިންވަރު ބަލާ ކޮމިޓީތައް އެކުލަވާލުމާ އެކު ޤާނޫނު ހަދާ މަޖިލީހުގެ ބާރުވެރިކަން އިތުރުވެފައިވާ ކަމަށް އޭނާ ވިދާޅުވި އެވެ.

މީގެ އިތުރުން ރަނިލް ވަނީ ލަންކާގެ ޤާނޫނީ ޑިމޮކްރަސީ ދެމެހެއްޓުމަށް އެޤައުމުގެ ކުރީގެ ލީޑަރުން ކުރި މަސައްކަތަށް މުޅި ޤައުމު ޝުކުރުވެރިވާން ޖެހޭކަން ފާހަގަ ކުރައްވަފައެވެ.