ވާވޭ މޭޓް 10 ނެރުމުގެ ދެ ހަފުތާ ކުރިން ފޯނުގެ ފޮޓޮއެއް ލީކްވެއްޖެއެވެ.

މިމަހު ނެރެން ހަމަޖެހިފައިވާ މި ފޯންގެ ފޮޓޯ ފުރަތަމަ ލީކްކޮށްލާފައިވަނީ އެމެރިކާގެ މަޝްހޫރު ބޮލޮގަރ އިވާން ބްލާސް، ނުވަތަ ސޯޝަލް މީޑިއާގައި މަޝްހޫރު ނަމުންނަމަ އީވީލީކްސް އިންނެވެ.

ލީކް ކޮށްލާފައިވާ ފޮޓޯގައި ވާވޭ މޭޓް 10 ޕްރޯގެ ފަހަތުގައި 2 ކެމެރާއާއި ފިންގަޕްރިންޓް ސްކޭނަރެއް އިނދެއެވެ. ވާވޭ މޭޓް 10 ޕްރޯގެ ކެމެރާ އުފައްދާފައިވަނީ މަޝްހޫރު ކެމެރާ މެނުފެކްޗަރާ ލެއިކާ އާ ގުޅިގެންނެވެ.ފޯންގެ ސްކްރީން މިހާރު ނެރޭ އެހެން ފޯނުތަކާ އެއްގޮތަށް ސްކްރީން ޓު ބޮޑީ އެސްޕެކްޓް ރޭޝިއޯ ބޮޑުކޮށް، މުޅި ފޯންގެ ކުރިމަތި ސްކްރީނަށް ވާ ގޮތަށެވެ.

މޭޓް 10 ޕްރޯގެ ސްކްރީނަކީ ހަ އިންޗި 2ކޭ ސްރީނެކެވެ. މީގެ އިތުރުން 4000 މިލިއެމްޕް ބެޓެރިއަކާއި ހަ ޖީބީ ރެމެއް މި ފޯނުގައި ހިމަނާފައިވެ އެވެ.  ފޯނު ލިބެން ހުންނާނި 64 ޖީބީއާއި 128 ޖީބީ ގެ  މޮޑެލްތަކުގައެވެ. ލީކްވެފައިވާ ފޮޓޯ ތަކުން ފެންނަގޮތުގައި ވާވޭ މޭޓް 10 ޕްރޯގެ ތިން ކުލައެެއް ވިއްކަން ވަނީ ހަމަޖެހިފަ އެވެ. އެއީ ކަޅުކުލައާއި ނޫކުލަ އަދި ހިތްގައިމު ޗޮކުލެޓުކުލައެވެ.

އެޕަލް އައިފޯން 10 އާއި ސެމްސަންގްގެ ފްލޭގްޝިޕް ފޯންކަމަށްވާ ސެމްސަންގް ގެލެކްސީ އެސް 8 އާ ވާދަކުރާނެ ވާވޭ މޭޓް 10 ޕްރޯ އާއި މޭޓް ސީރީޒްގެ އިތުރު ފޯނުތައް ރަސްމީކޮށް އިއުލާނުކުރަން ހަމަޖެހިފައި ވަނީ މިމަހު 16 ވަނަ ދުވަހުއެވެ.