އިޒްރޭލަށް ޑިޕްލޮމެޓިކް ގޮތުން ވަަރުގަދަ ގެއްލުމެއް ދިނުމަށް ފަހު ފަލަސްތީނުން ފުލުހުންނާ ބެހޭ ބައިނަލްއަގްވާމީ ޖަމިއްޔާ ނުވަތަ އިންޓަޕޯލްގެ މެމްބަރު ކަން ހޯދައިފިއެވެ. 

"އިންޓަނޭޝަނަލް ޕޮލިސް އޮގަނައިޒޭޝަން" ނުވަތަ އިންޓަޕޯލް އިން ފަލަސްތީން، އެ ޖަމިއްޔާގެ މެމްބަރަކަށް ހަމަޖެއްސީ މިއަހަރުގެ އެ ޖަމިއްޔާގެ އަހަރީ ބައްދަލުވުމުގައެވެ. ޗައިނާގެ ވެރިރަށް ބެއިޖިންގައި ބޭއްވި އިންޓަޕޯލްގެ މިއަހަރުގެ އަހަރީ ބައްދަލުވުމުގައި ފަލަސްތީނަށް އެ ޖަމިއްޔާގެ މެމްބަރުކަން ދޭން ނިންމީ ބުދަ ދުވަހު ނެގި ސިއްރު ވޯޓެއްގައެވެ. މި ވޯޓުގައި އިންޓަޕޯލްގެ 75 މެމްބަރުން ފަލަސްތީނަށް އެ ޖަމާއަތުގެ މެމްބަރުކަން ދޭން ފެންނަ ކަމަށް ވޯޓު ދިންއިރު 24 މެމްބަރުން ވަނީ މެމްބަރުކަން ނުދޭން ފެންނަ ކަމަށް ވޯޓު ދީފައެެވެ. ވަކިކޮޅަކަށް 34 މެމްބަރުން ވޯޓު ނުދެ އެވެ.

ފަލަސްތީނަށް އިންޓަޕޯލްގެ މެމްބަރުކަން ލިބުމާއި ގުޅިގެން ފަލަސްތީނުގެ ފޮރިން މިނިސްޓަރު ރިޔާދު އަލް މާލިކީ ނެރުއްވި ބަޔާނެއްގައި ވިދާޅުވީ ފަަލަސްތީނަށް ލިބުނު ކާމިޔާބީ ލިބުނީ އިންޓަޕޯލްގެ މެމްބަރު ގައުމުތަކުގެ މެދުގައި ސީދާ އަމާޒެއް އޮތުމުގެ ސަބަބުންނެވެ. 

ފަލަސްތީނަށް އިންޓަޕޯލްގެ މެމްބަރުކަން ލިބިނުދިނުމަށް އިޒްެރޭލުން ދިޔައީ ގިނަ މަސައްކަތްތަކެއް ކުރަމުންނެވެ. އިޒްރޭލުން އަބަދުވެސް ބުނަމުން ދަނީ ފަލަސްތީނަކީ ވުޖޫދުގައިވާ ގައުމެއް ނޫން ކަމަށާއި އެހެން ކަމުން އެއްވެސް ބައިނަލްއަގްވާމީ ޖަމާއަތެއްގެ މެމްބަރުކަމަށް ފަލަސްތީނު ވުމަށް ގަބޫލު ނުކުރެވޭނެ ކަމަށެވެ.