ބައެއް ގައުމުތަކުގެ ރައްޔިތުން އެމެރިކާ އަށް ވަނުން މަނާކޮށްފައިވާއިރު، އެ ލިސްޓަށް އުތުރު ކޮރެއާ އާއި ވެނެޒުވޭލާ އަދި ޗަޑްގެ ރައްޔިތުން އިތުރުކޮށްފިއެވެ.

މިކަމާ ބެހޭ ގޮތުން ވައިޓް ހައުސް އިން ބުނެފައި ވަނީ މި ގައުމުތައް ލިސްޓަށް އިތުރު ކުރީ ބައެއް ބޭރު ގައުމުތަކުން އެމެރިކާ އާއި ހިއްސާކޮށްފައިވާ މައުލޫމާތުތަކަށް ބެލުމަށް ފަހުގައި ކަމަށެވެ.

 ބައެއް ގައުމުތަކުގެ ރައްޔިތުން އެމެރިކާ އަށް ވަނުން މަނާކުރިކަން އެމެރިކާގެ ރައީސް ޑޮނަލްޑް ޓްރަމްޕް އާދީއްތަ ދުވަހު އިއުލާން ކުރައްވަމުން ވިދާޅުވީ އެމަނިކުފާނުގެ މައިގަނޑު އަމާޒަކީ އެމެރިކާ އަށް ރައްކާތެރިކަމާއި ސަލާމަތްތެރިކަން ހޯދާ ދިނުން ކަމަށެވެ. 

އެ ލިސްޓުގައި ކުރިން ހިމާނާފައިވާ ގައުމުތަކަކީ އިރާން، ލީބިޔާ، ސީރިޔާ، ޔަމަން އަދި ސޯމާލިއާއެވެ. އާ އަމުރުގެ ދަށުން ސޫދާން ލިސްޓުން އުނިކޮށްފައިވާއިރު އަލަށް ލިސްޓަށް އިތުރު ކުރި ގައުމުތަކަށް، އެގައުމުތަކުން މީހުން އެމެރިކާ އަށް ވަނުން މަނާ ވާނީ 18 އޮކްޓޯބަރުން ފެށިގެންނެވެ. 

ބައެއް ގައުމުތަކުގެ ރައްޔިތުން އެމެރިކާ އަށް އެތެރެވުން މަނާކުރާ ލިސްޓުގައި އެެންމެ ފުރަތަމަ ހިމެނިފައި ވަނީ މުސްލިމު ހަ ގައުމެވެ. މިކަމާ ގުޅިގެން "މުސްލިމުން އެމެރިކާ އަށް ވަނުން މަނާކުރާ" އަމުރެއްގެ ގޮތުގައި ރައީސް ޓްރަމްޕްގެ އެ އަމުރަށް، ފާޑުކިޔުންތައް އަމާޒުވަމުން ދިޔައެވެ. ރައީސް ޓްރަމްޕް ނެރުއްވި އަމުރާ ގުޅިގެން އެމެރިކާގެ ޝަރުއީ ދާއިރާއިން ވަރަށް ބޮޑަށް އެ އަމުރަށް ގޮންޖެހުންތައް ވެސް އައެވެ. އެގޮތުން ރައީސް ޓްރަމްޕް ގެ އަމުރު ސުޕްރީމް ކޯޓުގައި ފައިސަލާ ކުރެވި އަމުރުގެ ބައެއް ބައިތަކަށް އަމަލު ނުކުރެވޭނެ ކަމަށް ކަނޑައެޅިއެވެ. އަދި މިިއަންނަ އޮކްޓޯބަރުގައި އެ އަމުރު އިތުރަށް އެމެރިކާގެ ސުޕްރީމް ކޯޓުގައި ފައިސަލާ ކުރެވިގެން ދާނެއެވެ.