ތޫފާން އިރްމާ އެމެރިކާ އަށް އެރުމުގެ ސަބަބުން އެމެރިކާގެ ފްލޮރިޑާ ސްޓޭޓުގެ ގެތަކުގެ ތެރެއިން ތިންބައި ކުޅަ ދެބައި ގެތަކުގައި ކަރަންޓްގެ ޚިދުމަތް މެދު ކެނޑިފައިވާ ކަމަށް އޮފިޝަލުން ބުނެފިއެވެ. 

އިންޖިނިއަރުން ކަރަންޓުގެ ޚިދުމަތް ދިނުމަށް މަސައްކަތް ކުރަމުންދާއިރު ފްލޮރިޑާގެ 6.5 މިލިއަން ގެތަކުގައި އަދިވެސް ކަރަންޓްގެ ޚިދުމަތް ނެތް ކަމަށް ރިޕޯޓުތައް ބުނެއެވެ.  

ފްލޮރިޑާ ސްޓޭޓާއި އަދި އެ ސްޓޭޓު ކައިރީގައިވާ ޖަޒީރާ ރަށްތަކެއް ކަމަށްވާ "ފްލޮރިޑާ ކީސް" އަށް ތޫފާން އިރްމާ އެރި އިރު، އެ ތޫފާން އެރީ ކެޓެގަރީ ހަތަރެއްގެ ތޫފާނެއްގެ ގޮތުގައެވެ.

އާދިއްތަ ދުވަހު ތޫފާން އިރްމާ ފްލޮރިޑާ އަށް އެރިއިރު އަންގާރަ ދުވަހު އެ ތޫފާންގެ ބާރު މިހާރު ދަށްވެފައިވާ ކަމަށް ރިޕޯތުތައް ބުނެއެވެ. 

ތޫފާން އިރްމާ އެރުމުގެ ސަބަބުން އެމެރިކާގެ ފްލޮރިޑާ އިން މަދުވެގެން ހަތަރު މީހުން މަރުވެފައިވާ ކަމަށް ރިޕޯޓުތައް ބުނާއިރު، ތޫފާން އިރްމާ އެމެރިކާ އަށް އެރުމުގެ ކުރިން އަރާފައި ވަނީ ކެރީބިއަން ސަރަހައްދުގެ ގައުމުތަކަށެވެ. ކެރީބިއަން ސަރަހައްދުގެ ގައުމުތަކަށް ތޫފާން އިރްމާ އެރުމުގެ ސަބަބުން 37 މީހަކު މަރުވިއެވެ.