އަލްހާ އީދާ ދިމާކޮށް ޅ.ކުރެންދޫގައި ބޭއްވި ކުރެންދޫ ފުޓްސަލް ކަޕްގައި އެފްސީ ކަހާނީ ބަލިކޮށް އެފްސީ ކަލަމިންޖާ  މުބާރާތުގެ ޗެމްޕިއަންކަން ހޯދައިފި އެވެ.

އަންގާރަ ދުވަހު ކުޅުނު ފައިނަލް މެޗު ކަހާނީއާ ވާދަކޮށް ކަލަމިންޖާ މެޗު ކާމިޔާބު ކުރީ 3-4 ގެ ނަތީޖާއަކުންނެވެ.

މެޗުގައި ކަލަމިންޖާގެ އަބްދުﷲ އަބްދުލް ވައްހާބް ހެޓްރިކް ހަދާފައިވާއިރު، އަހުމަދު ނިޒާމް ވެސް ވަނީ ލަނޑެއް ކާމިޔާބު ކޮށްފައެވެ. ކަހާނީގެ ތިން ލަނޑު ވެސް ކާމިޔާބު ކޮށްދިނީ އަބްދުﷲ މާލިކް އެވެ. މެޗުގެ މޮޅު ކުޅުންތެރިޔަކަށް ހޮވުނީ އަބްލްﷲ އަބްދުލް ވައްހާބް އެވެ.

މުބާރާތުގެ އެންމެ މޮޅު ފަސް ކުޅުންތެރިންނަކީ ކަލަމިންޖާގެ އަބްދުﷲ ވާހިދު އިބްރާހިމް، މުހައްމަދު ސަމީހް، އަބްދުﷲ އަބްދުލް ވައްހާބް، ކަހާނީގެ އަހުމަދު ޝާހިދު އަދި އަހުމަދު އިކްރާމް އެވެ.

މުބާރާތުގެ އެންމެ ގިނަ ލަނޑު ޖެހި ކުޅުންތެރިޔަކަށް ހޮވިފައިވަނީ ކަހާނީގެ އަހުމަދު ޝާހިދު އެވެ. އޭނާ ވަނީ މުބާރާތުގައި 10 ލަނޑު ކާމިޔާބުކޮށްފައެވެ. މުބާރާތުގެ ޗެމްޕިއަން ޓީމަށް 5،000 ރުފިޔާގެ ފައިސާގެ އިނާމެއް ދީފައިވާއިރު، ދެވަނަ ޓީމަށް 2،500 ރުފިޔާގެ ފައިސާގެ އިނާމެއް ވަނީ ދީފައެވެ.

މި މުބާރާތް އިންތިޒާމްކުރާ ކްލެވާ ބޯއިސް އިން ބުނީ އަންނަ އަހަރުވެސް މުޅިން ތަފާތުކޮށް މުބާރާތް ބާއްވާނެ ކަމަށެވެ.