އޭޝިއަން ކަޕް ކޮލިފައިންގެ ގްރޫޕް ސްޓޭޖުގައި އޮމާން އަދި ރާއްޖެ ބައްދަލު ކުރާ މެޗަށް ތައްޔާރުވުމަށް ގަތަރުގައި ކޭމްޕް ކުރުމަށް ފަހު ގައުމީ ފުޓުބޯޅަ ޓީމު އާދީއްތަ ދުވަހު އޮމާނަށް ފުރައިފިއެވެ.

މިދިޔަ މަހުގެ 27 ވަނަ ދުވަހު ތަމްރީން ހެދުމަށް ގައުމީ ޓީމު ގަތަރަށް ފުރާފައިވާއިރު، ޓީމު ވަނީ ރަހްމަތްތެރިކަމުގެ މެޗެއް ވެސް ކުޅެފައެވެ. ގަތަރުގެ ޗެމްޕިއަން އަލް ދުހާލީއާ ދެކޮޅަށް ގައުމީ ޓީމު ކުޅުނު މެޗުން ބަލިވީ 0-1 ގެ ނަތީޖާއިންނެވެ.

ޖުމްލަ 23 ކުޅުންތެރިންނާއެކު ގައުމީ ޓީމުގެ ސްކޮޑު އެކުލަވާލާފައިވާއިރު، ސްކޮޑްގައި ނިއުރޭޑިއަންޓްގެ ނުވަ ކުޅުންތެރިޔަކު ހިމެނެއެވެ. މީގެ އިތުރުން ސްކޮޑްގައި މާޒިޔާގެ ހަ ކުޅުންތެރިއަކު ހިމެނޭއިރު، ޓީސީގެ ތިން ކުޅުންތެރިންނާއި، ގްރީން ސްޓްރީޓްގެ ދެ ކުޅުންތެރިންނާއި، ތިނަދޫގެ ދެ ކުޅުންތެރިންގެ އިތުރުން މިލަންދޫގެ ކުޅުންތެރިއަކުވެސް ހިމެނެއެވެ.

ގައުމީ ޓީމު ވަނީ އޭޝިއަންކަޕް ކޮލިފައިންގެ ގްރޫޕް ސްޓޭޖުގައި މިހާތަނަށް ދެ މެޗު ކުޅެފައެވެ. ފުރަތަމަ މެޗުން ފަލަސްތީން އަތުން ރާއްޖެ ބަލިވެފައިވާއިރު، ދެވަނަ މެޗުން ބޫޓާން އަތުން ރާއްޖެ ވަނީ މޮޅުވެފައެވެ.

ރާއްޖެ އަދި އޮމާން ބައްދަލުކުރާ މެޗު އޮންނާނީ އަންގާރަ ދުވަހު އެވެ. ރާއްޖެ މެޗަށް ތައްޔާރުވުމަށް އޮމާން ވަނީ އަފްއާނިސްތާނާ ދެކޮޅަށް ރަހްމަތްތެރިކަމުގެ މެޗެއް ކުޅެފައެވެ. އެ މެޗުން އަފްއާނިސްތާނާ ވާދަކޮށް އޮމާން މޮޅުވީ 0-2 ގެ ނަތީޖާއަކުންނެވެ.