ކުޅުން ހުއްޓާލުމަށް ފަހު ކުރިޔަށް ދާނީ ކޯޗިންގެ ދާއިރާއިން ކަމަށް މެންޗެސްޓާ ސިޓީގެ ކެޕްޓަން ވިންސެންޓް ކޮމްޕެނީ ބުނެފިއެވެ.
އަނިޔާގެ ސަބަބުން 31 އަހަރުގެ ކޮމްޕެނީއަށް މިދިޔަ ސީޒަނުގައި ގިނަ މެޗުތަކެއް ވަނީ ގެއްލިފައެވެ. ކޮމްޕެނީ ސިޓީއާއެކު ހަދާފައިވާ ކޮންޓްރެކްޓުގައި ބާކީ ދެ އަހަރު އޮތް އިރު އޭނާ ބުނެފައިވަނީ ކުޅުން ހުއްޓާލި ނަމަވެސް ފުޓުބޯޅަޔާ ދުރަށް ނުދާނެ ކަމަށެވެ.
ނޫސްވެރިންނާ ވާހަކަ ދައްކަމުން އޭނާ ބުނެފައިވަނީ ކެރިއަރު ނިމޭއިރު ހުންނާނެ ކްލަބެއް ނޭގޭ ކަމަށާއި އެހެން ނަމަވެސް ފުޓުބޯޅާއާ ދުރަށް ނުދާނޭ ކަމުގެ ފުރިހަމަ ޔަގީންކަން އެބައޮތް ކަމަށެވެ. އުމުރުން ހަ އަހަރުން ފެށިގެން އުޅެބޮޑުވީ ފުޓުބޯޅައިގެ ތެރޭގައި ކަމަށާއި ރިޓަޔާ ކުރުމަށްފަހުވެސް އެހެން ދާއިރާއަކުން އޭނާ ނުފެންނާނެ ކަމަށެވެ.
ޒުވާން ކުޅުންތެރިންނާ ވަރަށް ރަނގަޅު ގުޅުމެއް އޮންނަ ކަމަށާ އަދި އޭނާއަށް ލިބިފައިވާ ތަޖުރިބާގެ އަލީގައި އެ ކުޅުންތެރިންނަށް އެހީވުމަކީ އޭނާގެ އުއްމީދެއް ކަމަށް ކޮމްޕެނީ ހާމަކުރިއެވެ. އޭނާގެ ކުރިމަގާ ބެހޭގޮތުން ކޮމްޕެނީ އެއްވެސް ބަހެއް ބުނެފައެއް ނުވެއެވެ.
ބެލްޖިއަމްގެ ގައުމީ ޓިމުގައިވެސް މުހިންމު ރޯލެއް އަދާކުރަމުން އަންނަ ކޮމްޕެނީ ސިޓީއާ ގުޅިފައިވަނީ 2008 ވަނަ އަހަރު ޖަރުމަނުގެ ހޭމްބާގްއިންނެވެ. އޭނާ ވަނީ މިހާތަނަށް ސިޓީއަށް 300 އަށްވުރެ ގިނަ މެޗު ކުޅެދީ، އެ ކްލަބާއެކު ދެ ޕްރިމިއާ ލީގާއި އެފްއޭ ކަޕްއެއް ކާމިޔާބު ކޮށްފައެވެ.
