ބާސެލޯނާއާ އެކު ހަދާފައިވާ އެއްބަސްވުން އާޖެންޓީނާގެ ކެޕްޓަން ލިއޮނެލް މެސީ އާނުކުރާނެ ކަމަށް ރިޕޯޓްތައް ބުނެފި އެވެ.

ސްޕެއިންގެ ބައެއް ރިޕޯޓްތައް ބުނާގޮތުން އުމުރުން 30 އަހަރުގެ މެސީ އޭނާ ބާސާއާއެކު ހަދާފައިވާ އެއްބަސްވުން އާނުކޮށް، ކުރިޔަށް އޮތް އަހަރު ފްރީ ޓްރާންސްފާއެއްގެ ދަށުން އެހެން ކްލަބަކަށް ބަދަލުވާނެ އެވެ.

އެހެންނަމަވެސް ދާދި ފަހުން ރޭޑިއޯ އެންޗިއޯ ސްޕޯޓް އަށް ދިން އިންޓަވިއުއެއްގައި ބާސާގެ ޑައިރެކްޓާ އެރިއެޑޯ ބްރައިޑް ވިދާޅުވީ، ، މެސީ އަކީ ވަރަށް ޕްރޮފެޝަނަލް ކުޅުންތެރިޔެއް ކަމަށާއި، އޭނާގެ ހިތް އޮތީ ބާސާއާއެކު ކަމަށެވެ. އެގޮތުން އޭނާވެސް ބާސާ ދޫކޮށްލާނެ ކަމަށް ނުބެލެވޭ ކަމަށެވެ.

ބާސާގައި މެސީ 2021 ވަނަ އަހަރުގެ ނިޔަލަށް މަޑުކުރާނެ ކަމަށް އެ ކްލަބުން ބުނެފައިވާއިރު. ކުރިން ބެލެވުނު ގޮތުގައި މެސީ އާ އެއްބަސްވުމުގައި ސޮއިކުރުމަށް ހަމަޖެހިފައި އޮތީ ސީޒަން ފެށުމުގެ ކުރިންނެވެ. އެހެންނަމަވެސް އެކަން އެގޮތަށް އަދިވެސް ނުހިގައެވެ.

މެސީގެ އެއްބަސްވުމާ ގުޅިގެން ބާސާގެ ރައީސް ޖޯސެފް މާރިއޯ ބާޓަމައު ދާދި ފަހުން ވިދާޅުވީ، މެސީގެ އެއްބަސްވުމާ ގުޅިގެން ކްލަބާއި މެސީއާ ދެމެދު ހިޔާލުތަފާތުވުންތަކެއް ހުރި ނަމަވެސް އެކަން ވަރަށް ގާތުން ބަލަމުން އަންނަ ކަމަށާއި، އާ އެއްބަސްވުމުގެ ކަންތައް ވަރަށް އަވަހަށް ނިމޭނެ ކަމަށެވެ.

ދާދިފަހުން މެސީ ދިން އިންޓަވިއުއެއްގައި އޭނާ ބުނެފައިވަނީ، ކެރިއަރު ނިންމާލަން އޭނާ ބޭނުންވަނީ ބާސާގައި ކަމަށާއި، އެއީ އަބަދު ވެސް އޭނާ ދެކެމުން އައި ހުވަފެނެއް ކަމަށެވެ. ބާސެލޯނާގެ ޔޫތު އެކަޑަމީއިން ތަމްރީން ވެފައިވާ މެސީ ވަނީ މިހާތަނަށް އެ ކުލަބާއެކު ސްޕެނިޝް ލީގު 8 ފަހަރު، ސްޕެނިޝް ކަޕް 5 ފަހަރު، އަދި ޗެމްޕިއަންސް ލީގު 4 ފަހަރު ކާމިޔާބުކޮށްފައެވެ.