ރައީސް މުހައްމަދު ނަޝީދު ހިފާ ހައްޔަރުކޮށް، އެމަނިކުފާނަށް މަރުގެ އަދަބު ދިނުމަށް ސްޕޯޓްސް ކޮމިޝަނަރު އަހުމަދު ނަޝީދު(ޑޭވް) ގޮވާލައްވައިފި އެވެ.
ސްޕޯޓްސް ކޮމިޝަނަރު މިފަދައިން ވިދާޅުވެފައިވަނީ އިންޑިއާގެ ރިސާޗް އެންޑް އިންފޯމޭޝަން ސިސްޓަމް ފޯ ޑިވެލޮޕިން ކަންޓްރީސްއިން އިންތިޒާމް ކޮށްގެން ބޭއްވި "ސައުތު ސައުތު އެންޑް ޓްރޭންގިއުލާ ކޯޕަރޭޝަން“ ކޮންފަރެންސް ނިންމުމުގެ ރަސްމިއްޔާތު ޝަރަފްވެރިކޮށްދެއްވައި ތަގުރީރު ކުރައްވަމުން ރައީސް ނަޝީދު ދެއްކެވި ވާހަކަފުޅުގެ ހަބަރާއެކު ފޭސްބުކްގައި ކުރެއްވި ޕޯސްޓެއްގައެވެ.
އަހުމަދު ނަޝީދު ވިދާޅުވީ "މި ގައްދާރު ހިފާ ހައްޔަރުކޮށް މަރުގެ އަދަބު ދޭންޖެހޭ" ކަމަށާއި "މީނާ މިއީ ގައުމީ ސަލާމަތަށް ހުރި ނުރައްކަލެއް" ކަމަށެވެ.
ރައީސް ނަޝީދު ކުރެއްވި ތަގުރީރުގައި ވިދާޅުވެފައިވަނީ މެދުއިރުމަތިން އައިސިސް ފޮހެމުންދާ ކަމަށާއި އައިއެސް ދެން އެނބުރި އަންނަނާނީ ތަރައްގީވަމުން އަންނަ ރާއްޖެ ފަދަ ޑިމޮކްރަޓިކް ގައުމުތަކަށް ކަމަށެވެ.
މީގެ އިތުރުން ރައީސް ނަޝީދު ވިދާޅުވެފައިވަނީ އާބާދީއަށް ބަލާއިރު ނިސްބަތުން އެންމެ ގިނަ އަދަދެއްގެ ބަޔަކު އައިއެސްގައި ހަރަކާތްތެރިވަމުންދަނީ ރާއްޖެއިންނެވެ.
ސްޕޯޓްސް ކޮމިޝަނަރު އަހުމަދު ނަޝީދަކީ ރައީސް ނަޝީދަށް ވަރަށް ބޮޑަށް ސޯޝަލް މީޑިއާގައި ވަރަށް ބޮޑަށް ފާޑު ވިދާޅުވާ ބޭފުޅެކެވެ.
