ތައިލެންޑްގެ ކުރީގެ ބޮޑުވަޒީރު ޔިންގްލަކް ޝިނަވަޓްރާ އަށް ހުކުމް ކުރުން ތާވަލް ކޮށްފައި އޮއްވައި، ފިއްލަވައިގެން ދުބާއީއަށް ވަޑައިގެންފި އެވެ.

ޔިންގްލަކް ޝިނަވަޓްރާގެ ބޮޑުވަޒީރުކަމުގައި  ފަގީރުންގެ ވޯޓް ހޯދުމަށް ތައާރަފު ކުރި ހަނޑުލުގެ ސަބްސިޑީ ސްކީމުގެ ސަބަބުން ތައިލެންޑްގެ ސަރުކާރަށް އަށް ބިލިއަން ޑޮލަރުގެ ގެއްލުން ވެފައިވެ އެވެ. މި މައްސަލައިގައި  އެކަމަނާގެ އިހްމާލު އޮތް ކަމަށް ބުނެ ދައުވާ  އުފުލައިވާ މައްސަލައިގައި ހުކުމާ ހަމައަށް މިހާރު ވަނީ ގޮސްފަ އެވެ.

މި މައްސަލައިގައި ޔިންގްލަކް އަށް 10 އަހަރުގެ ޖަލު ހުކުމެއް  އަންނައިރު، ހުކުމް އިއްވުން އޮންނާނީ ސެޕްޓެމްބަރު 27 ގަ އެވެ.

ޔިންގްލަކު ގެއްލިގެން އުޅޭ ކަމަށް ބައެއް ފަރާތްތަކުން ބުނާއިރު، އެކަމަނާ ދުބާއީއަށް ވަޑައިގަތީ ސިންގަޕޫރު މަގުން ކަމަށް، އެކަމަނާ ނިސްބަތްވާ ޕާޓީގެ މަސްދަރަކުން ވަނީ ބުނެފަ އެވެ.

އެކަމަނާ ފިއްލަވައިގެން ދުބާއީ އަށް މި ވަޑައިގަތީ، އެކަމަނާގެ ކަފާލާތު ހުއްޓުވައި، ހައްޔަރު ކުރަން އަމުރެއް ވެސް ނެރެފައިވާ ކަމުގެ އަޑުތައް ފެތުރިފައި ވަނިކޮށެވެެ.

ޔިންގްލަކު ދުބާއީ އަށް ވަޑައިގެންނެވިއިރު، ބޭބޭފުޅު ކުރީގެ ބޮޑުވަޒީރު ތަކްސިން ޝިނަވަޓްރާ ވެސް އަމިއްލަ އަށް އަރުވާލެއްވިގެން ދިރިއުޅުއްވަމުން ގެންދަވަނީ ދުބާއީގަ އެވެ. އޭނާ ދުބާއީ އަށް 2008 ވަނަ ވަޑައިގަތީ، ކޮރަޕްޝަންގެ މައްސަލައިގައި އިއްވި ޖަލު ހުކުމަށް ފިއްލަވަން ވެގެންނެވެ.

ޔިންގްލަކު ދުބާއީއަށް ވަޑައިގެންނެވި ކަމަށް ބުނި ނަމަވެސް ތައިލެންޑްގެ ފުލުހުންނާއި އިމިގްރޭޝަނުން ބުނަނީ އެކަމަނާ ތައިލެންޑުން ބޭރަށް ވަޑައިނުގަންނަވާ ކަމަށް ރެކޯޑްތަކުން ދައްކާ ކަމަށެވެ. މި މައްސަލަ ތައިލެންޑްގެ ފުލުހުން ދަނީ ބަލަމުންނެވެ.