އެމެރިކާގެ އަސްކަރީ މަނަވަރު "ދަ ޔޫއެސްއެސް ޖޯން މެކޭން" ނިސްބަތްވާ  އެމެރިކާގެ ސެވަންތް ފްލީޓްގެ ކޮމާންޑަރު ވައިސް އެޑްމިރަލް ޖޯސެފް އޯކެއިން މަގާމުން ވަކި ކުރަން، އެމެރިކާގެ ނޭވީ އިން ނިންމައިފި އެވެ. 

ޖޯސެފް  މަގާމުން ވަކިކުރަން ނޭވީ އިން ނިންމިއިރު ރަސްމީކޮށް އެކަން އިއުލާން ކުރާނެ ތާރީޚެއް އަދި ނޭނގެ އެވެ. 

އެމެރިކާގެ އަސްކަރީ މަނަވަރު "ދަ ޔޫއެސްއެސް ޖޯން މެކޭން" ވަނީ ދާދިފަހުން ސިންގަޕޫރުގެ އައްސޭރި ފަށުން ދަތުރު ކުރަނިކޮށް އޮއިލް ޓޭންކަރަކާ އެކްސިޑެންޓްވެފައެވެ. 

އޯގަސްޓް 21 ވަނަ ދުވަހު ހިނގި މަނަވަރު އެކްސިޑެންޓް ހާދިސާގައި އެ މަނަވަރުން ދަތުރުކުރި މީހުންގެ ތެރެއިން  10 ސެއިލަރަކު ގެއްލުނެވެ. އަދި ފަސް މީހަކަށް އެކިވަރުގެ އަނިޔާތައް ވަނީ ލިބިފައެވެ. ބުދަ ދުވަހު އިވިގެން ދިޔަ ޚަބަރަކީ ގެއްލުނު 10 ސެއިލަރުންގެ ތެރެއިން ބައެއް މީހުންގެ ހަށިތައް ފެނިފައިވާ ކަމެެވެ.

އެމެރިކާގެ ނޭވީގެ މަނަވަރު އެކްސިޑެންޓްވި އިރު އެ އުޅަނދު ދަތުރު ކުރަމުން ދިޔައީ ސިންގަޕޫރުގެ ބަނދަރަށް ވަނުމަށެވެ.

ސިންގަޕޫރުގެ ވަށައިގެންވާ  ކަނޑުގެ ސަރަހައްދަކީ ދުނިޔޭގެ އެންމެ ކާރޫބާރޫ ބޮޑު ކަނޑުގެ ސަރަހައްދުތަކުގެ ތެރޭގައި ހިމެނޭ ސަރަހައްދެކެވެ. އެ ސަރަހައްދުން ގިނަ މުދާތަކެއް އަބަދުވެސް  އެކިގައުމުތަކަށާއި އަދި ސިންގަޕޫރަށް ގެނެވެއެވެ.