ދެކުނު ޗައިނާގެ އެކި ހިސާބުތަަކަށް ތޫފާން ހަޓޯ އެރުމުގެ ސަބަބުން 12 މީހަކު މަރުވެ އެތައް ބަޔަކު ޒަޚަމްވެއްޖެ ކަމަށް ރިޕޯޓުތައް ބުނެފިއެވެ.

ޗައިނާގެ ދެކުނުގެ ސިޓީތައް ކަމަށްވާ ޒުހައީ ސިޓީ އާއި ގުއޮންޑޮންގް ޕްރޮވިންސަށް ތޫފާން ހަޓޯ އެރީ ބުދަ ދުވަހު ބާރުގަދަ ވަޔާއި އަދި ބޯ ވާރެޔާއެކުގައެވެ.

ތޫފާން ހަޓޯ އެރުމާއި ގުޅިގެން ހޮންކޮން އިން ވަނީ ތޫފާންގެ ވޯނިން ސިގްނަލް 10 އަކަށް އިތުރު ކޮށްފައެވެ. 10 އަކީ އެންމެ މަތީ ލެވެލް އެވެ. އަދި މަކާއޯ ވެސް ވަނީ ތައްޔާރީ ހާލަތުގައެެވެ. މަކާއޯ އިން ހަތަރު މީހަކު މަރުވެފައިވާ ކަމަށް ރިޕޯޓުތައް ބުނެއެވެ.

ދެކުނު ޗައިނާ އަށް މިހާރު އަރާފައިވާ ތޫފާންގެ ސަބަބުން މެއިންލޭންޑް ޗައިނާ އިން 27،000 މީހަކު ރައްކާތެރި ހިސާބުތަކަށް ވަނީ ބަދަލުކޮށްފައެވެ.

ތޫފާން އެރުމާއި ގުޅިގެން ޗައިނާގެ އެކި ސަރަހައްދުތަކުގައި ފެންބޮޑުވެ އަދި ކަރަންޓް ވަނީ ކެނޑިފައެވެ.