މަޖިލީހަށް މިއަދު ސިފައިން ނުވަންނަ ކަމަށާއި އެހެން ނަމަވެސް މަޖިލީސް ޗެމްބަރުގެ ތެރެއަށް ސެކިއުރިޓީން ވަންނަން ޖެހޭ ހާލަތަށް ކަންކަން ބަދަލުކުރީ އިދިކޮޅު މެންބަރުން މަޖިލީހުގެ މުދަލަށާއި ތަކެއްޗަށް ގެއްލުންދޭތީ ކަމަށް ޕީޕީއެމް ޕާލިމެންޓްރީ ގްރޫޕުގެ ލީޑަރު އަހްމަދު ނިހާނު ހުސައިން މަނިކު ވިދާޅުވެއްޖެ އެވެ.

މަޖިލީހުގެ ޖަލްސާ ކުރިއަށްދިޔަ ގޮތާ ގުޅޭ ގޮތުން މަޖިލީސް ބޭރުގައި ނޫސްވެރިންނަށް މައުލޫމާތު ދެއްވަމުން ނިހާން ވިދާޅުވީ، މަޖިލީހުގައި ސެކިއުރިޓީން ގިނަ ކޮށްގެން މަޖިލީހުގެ މަސައްކަތްތައް ކުރައްވަންޖެހުނީ، އިދިކޮޅު މެންބަރުންގެ އަމަލުތަކުގެ ސަބަބުން ކަމަށެވެ. އެގޮތުން މިދިޔަ ޖުލައި 31 ވަނަ ދުވަހު ބޭއްވި މަޖިލީހުގެ ޖަލްސާ ފެށުމުގެ ކުރިން މަޖިލީހުގެ ރިޔާސަރުގެ ގޮނޑި ނެރެ މަޖިލީހުގެ ގޯތިތެރޭގައި ބަހައްޓާ ހިސާބަށް ކަންކަން ދިއުމުން އެކަންކަން ހުއްޓުވުމަށް މަސައްކަތް ކުރަންޖެހޭނެ ކަަމަށެވެ.

"މަޖިލީހުގެ ރިޔާސަތު ފޯޓިފައި ކުރެއްވީމަ ސެކިއުރިޓީންނަށް މަޖުބޫރުވާނެ،ޖަލްސާ ކުރިއަށްގެންދާ ވަގުތުވެސް މަޖިލީހުގެ ޗެމްބަރަށް ވަންނަން. ސިފައިން ހަތިޔާރު ހިފައިގެން ވަދެގެނޫން މިއުޅެނީ." ނިހާނު ވިދާޅުވި އެވެ.

މަޖިލީހުގެ ރިޔާސަތު ކޮންމެ ދުވަހަކު ހިސޯރުކޮށްގެންނެއް މަޖިލީހުގެ މުވައްޒަފުންގެ މަސައްކަތަށް އުނދަގޫވާ ވަރަށް ކަންވަމުންދާ ކަމަށް ނިހާނު ވިދާޅުވި އެވެ. މިކަހަލަ ހާލެއްގައި މަޖިލީހުން ސެކިއުރޓީން ވެއްދުމަކީ މަޖިލީހުގެ ގަވައިދާ ހިލާފު ކަމެއް ކަމަށް ގަބޫލު ނުކުރާ ކަމަށް އޭނާ ވިދާޅުވި އެވެ. އަދި މަޖިލީހުގެ ހާލަތު އެ ލެވެލްއަށް ދިއުމުން، މަޖިލީހުގެ ރައީސަށް އެފަދަ ފިޔަވަޅު އެޅޭނެ ކަމަށް އޭނާ ވިދާޅުވި އެވެ

"ފުރިހަމައަށް ގާނޫނު އަސާސީގައި ހާމަކުރާ ފުރިހަމަ މަރުހަލާގެ ތެރެއިން މަޖިލީހުގެ ގަވައިދުގައި ވަރަށް ސާފުކޮށް ފާޅުކަން ބޮޑު ގޮތެއްގައި ދީފައިވާ އިހްތިޔާރެއް މިއީ. މަޖިލީހުގެ ފާރުން އެތެރޭގެ ހުރިހާ ސެކިއުރިޓީއެއް ބެލެހެއްޓުމަށްޓަކާ މަޖިލީހުގެ ރައީސް އިޝާރާތެއް ކުރައްވައިފި ނަމަ އެކަން ބަލަހައްޓާނީ ދައުލަތުގެ ސަލާމާތީ ބާރުންނޭ،" ނިހާނު ވިދާޅުވި އެވެ.

ނިހާނު ވިދާޅުވީ، މިހާރުވެސް މަޝްވަރާ ކުރެވޭ ކަމަށާއި މަޝްވަރާ ކުރެވުނު ނަމަވެސް އިދިކޮޅު ފަރާތްތަކުން އެއްވެސް ވަރަކަށް މަޖިލީހުގެ ޖަލްސާއެއް ކުރިއަށް ގެންދިއުމަށް ބޭނުން ނުވާ ކަމަށެވެ.

ނިހާނު ވިދާޅުވީ، އިދިކޮޅު މެންބަރުން ގަބޫލު ނުކުރިއަސް މިއަދުވެސް މަޖިލީހުގެ ރައީސަކީ މަސީހުކަން ޕީޕީއެމް މެންބަރުން ގަބޫލު ކުރާ ކަމަށެވެ. އަދި މަޝްވަރާ ކުރުމަށް އެއްބާރުލުން ނުލިބެނީ އިދިކޮޅު މެންބަރުންގެ ފަރާތުން ކަމަށް ނިހާނު ވިދާޅުވި އެވެ.

"އިދިކޮޅު މެންބަރުން، 45 މެންބަރުންގެ ސޮޔާއި އެކު މަޖިލީހަށް ފޮނުއްވި. ފޮނުވީމަ، އޮންނަންޖެހޭ ޕްރޮސެސްގެ ތެރެއިން އޮންނަޖެހޭ މުއްދަތުގެ ތެރޭގައި އެކަންކަން ނުވިކަން އެބޭފުޅަށްވެސް އެނގޭނެ. އަދި ކޮންމެފަދަ ހާލަތެއް މެދުވެރިވި ނަމަވެސް. ކޮންމެ ގޮތަކުން ދިމާވެގެން ނަމަވެސް، އެކަން ތަރުޖަމާ ކުރާކަށް ބޭނުމެއް ނޫން،" ނިހާނު ވިދާޅުވި އެވެ.

ނިހާނު ވިދާޅުވީ އިދިކޮޅު މެންބަރުން ވެސް ޖަލްސާއެއް ބާއްވައިގެން އެބޭފުޅުންގެ ހިޔާލުތައް ފާޅުކުރަށްވާންވީ ކަަމަށެވެ. އެ ބޭފުޅުންގެ ޝުއޫރުތައް ރައްޔިތުންނަށް ހާމަކުރަމުން ގެންދިއުމަށާއި އިސްލާމް ދީނުގެ އަސްލުތަކާއި އުސޫލުތަކާއި ހިލާފު ނުވާނެ ކޮންމެ ވާހަކައެއް މަޖިލީހުގައި ދެއްކޭނެ ކަމަށެވެ.

" އަޅުގަނޑަކަށް ހިއެއް ނުވޭ މިއީ ސިވިލައިޒް މުޖުތަމައު އަކުން އަމަލުކުރަންޖެހޭނެ ގޮތެއް ކަމަށް. އޯކޭ، އެބޭފުޅުން މިވަގުތު ގަބޫލުނުކުރަނީ. އެކަމަކު އަބަދުވެސް އެބައޮތެއް ނޫންތޯ އެބޭފުޅުންގެ މެންޑޭޓުގެ ތެރެއިން އެބޭފުޅުން ބޭނުންވާ ވާހަކައެއް ހާމަކުރުމުގެ ފުރުސަތު. އަދި އެވާހަލަތައް ރެކޯޑުކުރުމުގެ ފުުރުސަތުވެސް ދެވޭނެ. ރެކޯޑުން ކުރާ ކަންކަން ހުއްޓާ، ރަސްމީކޮށް މިކަންކަން ހައްލުކުރުމަށް އަންނަންވީ." ނިހާނު ވިދާޅުވި އެވެ.