އިޓަލީގެ ރަށެއް ކަމަށްވާ އީސްކިއާއަށް 4.0 މެގްނިޓިއުޑްގައި އައި ބިންހެލުމެއްގައި އެކަކު މަރުވެ 25 މީހުން ޒަޚަމްވެއްޖެއެވެ.

އިޓަލީގެ މީޑިޔާތަކުން ބުނީ އިޓަލީގެ ޓައުނެއް ކަމަށްވާ ޗަސަމީޗޮލާގެ އިމާރާތްތައް ވެއްޓި 10 މީހެއް ނުފެނިވާ ކަމަށެވެ.

ނޭޕްލްސްގެ އައްސޭރިފަށުގައި އޮންނަ މި ސަރަހައްދަކީ 50،000 މީހުންގެ އާބާދީއެއް އޮންނަ ރަށަކަށްވާއިރު އެތަނަކީ ޓޫރިސްޓުންގެ މެދުގައި އިންތިހާއަށް މަގުބޫލު ތަނެކެވެ.

ސޯޝަލް މީޑިއާގައި އާއްމުކޮށްފައިވާ ފޮޓޯތަކުން ފެންނަ ގޮތުގައި އިމާރާތްތަކަށްވަނީ ބޮޑެތި ގެއްލުންތަކެއް ވެފައެވެ. އޭގެ ތެރޭގައި ގަދީމީ ޗަރޗެއް ވެސް ހިމެނެއެވެ.

އެ ގައުމުގެ މީޑިއާ ރިޕޯޓްތައް ބުނާ ގޮތުން ހޮސްޕިޓަލުގެ ޖާގަ ހަދައި ކުއްލި ހާލަތުގައި މަސައްކަތްކުރާ ފަރާތްތަކުން ވަނީ ވެއްޓިފައިވާ އިމާރާތްތަކުގެ ދަށުން މީހުން ސަލާމަތްކުރުމުގެ މަސައްކަތް ފަށާފައެވެ.

ރަށުގެ ބައެއް ސަރަހައްދުތަކުން ކަރަންޓް ކެނޑިފައިވާ ކަމަށް ވެސް ރިޕޯޓްތައް ބުނެއެވެ.

ކުއްލި ހާލަތުގައި މަސައްކަތްކުރާ ފަރާތްތައް އެރަށަށް ގޮސްފައި ވަނީ ފެރީ އާއި ހެލިކޮޕްޓަރުގައެވެ.

އެ ރަށުގައި ޖަންގަލީގައި ރޯވެފައިވާ އަލިފާން ނިންވުމަށް ގޮސް ތިބި ކުއްލި ހާލަތުގައި މަސައްކަތްކުރާ ބައެއް ފަރާތްތައް ބިން ހެލުން އައިއިރު ވެސް ތިބީ އެރަށުގައެވެ.

އިޓަލީގެ ރެޑްކްރޮސްއިން ވަނީ ލޯކަލް އިދާރާތަކާއެކު މަސައްކަތްކުރަމުންދާ ކަމަށް ޓްވިޓަރގައި ކަށަވަރުކޮށްދީފައެވެ.