ސޫރިއާގެ ރައީސް ކަމަށް އަހްމަދު އައް-ޝަރާއު އައްޔަން ކޮށްފިއެވެ.
ބައްޝާރު އަލް-އަސަދު ވެރިކަމުން ވައްޓާލުމަށްފަހު ބާރުތައް ނެންގެވި އައް-ޝަރާޢު ވަނީ ވަގުތީ ރައީސްކަމަށް އައްޔަނު ކޮށް، އިންތިޤާލީ ގާނޫނު ހަދާ މަޖިލީހެއް އެކުލަވާލުމުގެ މަސްއޫލިއްޔަތު ޙަވާލުކުރެވިފައިކަމަށް ދައުލަތުގެ މީޑިއާ އިން ބުދަ ދުވަހު ރިޕޯޓުކޮށްފައިވެއެވެ.
29 އޮކްޓޯބަރު 1982 ގައި އުފަންވި އަޙްމަދު ޙުސައިން އައް-ޝަރާޢު، އަކީ އަބޫ މުޙައްމަދު އަލް-ޖޫލާނީގެ ނަމުންވެސް މަޝްހޫރު ވެފައިވާ ފަރާތެކެވެ. އޭނާ އަކީ ސޫރިއާގެ އިންޤިލާބީ، އަސްކަރީ ކޮމާންޑަރެއްގެ އިތުރުން ސިޔާސީ ލީޑަރެކެވެ. 29 ޖަނަވަރީ 2025 ގައި މަގާމަށް އައްޔަން ކުރުމާއެކު އޭނާ އަކީ ސޫރިއާގެ 20 ވަނަ ރައީސްއެވެ.
2017 އިން 2025 އަށް ހައިއަތު ތަޙްރީރު އައްޝާމް (އެޗްޓީއެސް) ގެ އަމީރުގެ ގޮތުގައި ހުންނަވާ، 2024 ގެ ސޫރިއާގެ އިދިކޮޅު ފަރާތްތަކުން ސަރުކާރާ ދެކޮޅަށް ދިން ހަމަލާތަކުގައި އޭނާ މުހިންމު ދައުރެއް އަދާކުރެއްވިއެވެ. މިކަމުގެ ސަބަބުން އަލް-އަސަދުގެ ވެރިކަން ވެއްޓި، ސޫރިއާގެ އިންތިޤާލީ ސަރުކާރު ޤާއިމުކުރެވުނެވެ. އޭގެ ފަހުން އައް-ޝަރާޢު ވަނީ ރައީސްކަމަށް ޢައްޔަންކުރެވެންދެން ޤައުމު ހިންގެވުމުގައި އިސްދައުރެއް އަދާ ކުރައްވާފައެވެ.
އައް-ޝަރާޢު އުފަންވެފައިވަނީ ސަޢޫދީ ޢަރަބިއްޔާގެ ރިޔާޟް ގައި، ސޫރިއާގެ ގޯލާން ހައިޓްސްއިން ހިޖުރަ ކުރި ސުންނީ މުސްލިމު ޢާއިލާއަކަށެވެ. 2003 ގެ ޢިރާޤަށް އިސްތިޢުމާރީ ބާރުތަކުން އަރައިގަތުމުގެ ކުޑަ ދުވަސްކޮޅެއް ކުރިން، އޭނާ ވަނީ އަލްޤާޢިދާގެ ޢިރާޤު ގޮފީގައި ބައިވެރިވެ، ތިން އަހަރު ވަންދެން ޢިރާޤުގެ އިދިކޮޅު ހަރަކާތުގައި ހަނގުރާމަކޮށްފައެވެ.
އެމެރިކާގެ ބާރުތަކުން އޭނާ ހައްޔަރުކޮށް 2006 އިން 2011 އަށް ޖަލުގައި ބަންދުކުރިއެވެ. އޭނާ ދޫކޮށްލެވުނީ ސޫރިއާގައި އަލް-އަސަދުގެ ސަރުކާރާ ދެކޮޅަށް ފެށުނު އިންޤިލާބާ ދިމާކޮށެވެ. އައް-ޝަރާޢު ވަނީ 2012 ގައި އަލްޤާޢިދާގެ އެހީތެރިކަމާއެކު އަލްނުޞްރާ ފްރަންޓް އުފައްދާފައެވެ. މިއީ އަލް-އަސަދުގެ ސަރުކާރާ ދެކޮޅަށް ސޫރިއާގެ އަހުލީ ހަނގުރާމައިގައި ބައިވެރިވުމަށްޓަކައެވެ. އަލް-ނުޞްރާ ފްރަންޓްގެ އަމީރުގެ ގޮތުގައި ހުރެ، އައް-ޝަރާޢު ވަނީ އިދްލިބު ގައި ބާރުގަދަ ސަރުކާރެއް ޤާއިމުކޮށްފައެވެ. އޭނާ ވަނީ އަބޫ ބަކުރު އަލްބަޣްދާދީ އަލްނުޞްރާ އިސްލާމިކް ސްޓޭޓާ އެއްކޮށްލަން މަސައްކަތްކުރި ކުރުމަށް ދެކޮޅުހަދާފައެވެ. މީގެ ސަބަބުން ދެ ޖަމާޢަތުގެ މެދުގައި ހަނގުރާމައެއް ހިނގިއެވެ.އެމެރިކާގެ ސްޓޭޓް ޑިޕާޓްމަންޓުން ވަނީ މެއި 2013 ގައި އައް-ޝަރާޢު އަކީ "ދުނިޔޭގެ ޓެރަރިސްޓެއް" ގެ ގޮތުގައި ލިސްޓުކޮށްފައެވެ. އަދި އޭގެ ހަތަރު އަހަރު ފަހުން އޭނާ ހައްޔަރުކުރުމަށް މަގުފަހިކޮށްދޭ މަޢުލޫމާތެއް ދިން ފަރާތަކަށް 10 މިލިއަން ޑޮލަރުގެ އިނާމެއް ހުށަހެޅިއެވެ. އެހެން ނަމަވެސް މި ހުށަހެޅުން ވަނީ ޑިސެމްބަރ 2024 ގައި އަނބުރާ ގެންގޮސްފައެވެ. އެއީ އައް-ޝަރާޢު އެމެރިކާގެ އެސިސްޓަންޓް ސެކްރެޓަރީ އޮފް ސްޓޭޓް ފޮރ ނިއަރ އީސްޓަން އެފެއާޒް އިސްކޮށް ހުންނެވި އެމެރިކާގެ ވަފުދަކާ ބައްދަލުކުރެއްވުމަށް ފަހުގައެވެ.
ސަޢޫދީ ޢަރަބިއްޔާގެ ރަސްގެފާނު ސަލްމާނާއި ވަލީޢަހުދު މުޙައްމަދު ބިން ސަލްމާން ވަނީ އަޙްމަދު އައް-ޝަރާޢު ސީރިޔާގެ ވަގުތީ ރައީސް ކަމަށް ޢައްޔަންކުރެއްވުމާ ގުޅިގެން މަރުޙަބާ ދަންނަވާފައިކަމަށް ސަޢޫދީގެ ރަސްމީ ނޫސް އޭޖެންސީ (އެސްޕީއޭ) އިން ބުރާސްފަތި ދުވަހު ރިޕޯޓުކޮށްފައިވެއެވެ.
ފާއިތުވި ހަފުތާގައި ސަޢޫދީގެ ޚާރިޖީ ވަޒީރު އަމީރު ފައިޞަލް ބިން ފަރުޙާން ވަނީ ދިމިޝްގަށް ޒިޔާރަތްކުރައްވައި އައް-ޝަރާޢު އާ ބައްދަލުކުރައްވާފައެވެ. އަމީރު ފައިޞަލް ވިދާޅުވި ގޮތުގައި ރިޔާޟުން މަސައްކަތް ކުރަމުން ދަނީ ކުރިން އެ ގައުމާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތައް ނައްތާލުމަށް އެހީތެރިވަމުންނެވެ.
އިތުރަށް އެމަނިކުފާނު ވިދާޅުވީ ސަޢޫދީ ޢަރަބިއްޔާ ސޫރިޔާ އާ އެކުގައިވާ ކަމަށާއި، "ހުރިހާ ފިޔަވަޅުތަކެއް ނައްތާލުން އަވަސްކުރުމުގެ މުހިންމު" ކަމަށެވެ.
އަލް-އަސަދުގެ ވެރިކަން ވެއްޓުމާއެކު އެ ގައުމަށް ފުރަތަމަ ޒިޔާރަތް ކުރީ ވެސް ސައުދީ އަރަބިއްޔާގެ ވަފުދެކެވެ.
