ޔުއެފާ ޗެމްޕިއަންސް ލީގުގައި ސްލޮވަން ބްރަޓިސްލާވާ ދެކޮޅަށް ކުޅުނު މެޗުން މޮޅުވެ، ބަޔާން މިއުނިކް ޕްލޭ އޮފް ބުރުގައި ވާދަކުރަން ފުރުސަތު ހޯދައިފި އެވެ.

ބަޔާންގެ އަމިއްލަ ދަނޑު، އަލިއާންޒް އެެރީނާގައި ބުދަ ދުވަހުގެ ރޭ ކުޅުނު މެޗު އެ ޓީމުން ކާމިޔާބު ކުރީ 3-1 އިންނެވެ. މެޗުގެ ފުރަތަމަ ހާފުގައި ބަޔާނުން އެއް ލަނޑު ޖެހިއިރު، އަނެއް ދެ ލަނޑު ޖެހީ ދެ ވަނަ ހާފުގަ އެވެ. އަދި މި ހާފުގައި ބްރަޓިސްލާވާ އިން ވެސް ވަނީ ލަނޑެއް ޖަހައިފަ އެވެ.

މެޗު ފަށައިގެން އަށް ވަނަ މިނެޓުގައި ބަޔާނަށް ކުރި ހޯދައިދިނީ ތޯމަސް މުލާ އެވެ. އެ ލަނޑު ޖަހަން މުލާ އަށް ފުރުސަތު ތަނަވަސްކޮށްދިނީ ޔޯޝުއާ ކިމިކް އެވެ. މެޗުގެ ދެ ވަނަ ހާފުގައި ބަޔާންގެ ދެ ވަނަ ލަނޑު ޖެހީ އިންގްލެންޑުގެ ކެޕްޓަން ހެރީ ކޭން އެވެ. އެއީ ޖަމާލް މުސިއާލާ ތަނަވަސްކޮށްދިން ފުރުސަތެއްގައި ކޭން ޖެހި ލަނޑެކެވެ. މެޗުގެ ފުރިހަމަ ވަގުތު ހަމަވާން ހަ މިނެޓަށް ވެފައި ވަނިކޮށް ބަޔާންގެ ތިން ވަނަ ލަނޑު ޖެހީ ކިންގްސްލީ ކޯމަން އެވެ. އެއީ ސާޖް ގްނަބްރީ ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ. މެޗުގެ އެންމެ ފަހު ވަގުތުގައި ބްރަސްޓިވާލާގެ ހަމައެކަނި ލަނޑު ޖެހީ މާކޯ ޓޮލިކް އެވެ.

މޮޅާއެކު ބަޔާން އޮތީ ތާވަލްގެ 12 ވަނައިގަ އެވެ. އެއީ މިހާތަނަށް އެ ޓީމު ކުޅެފައިވާ އަށް މެޗުން 15 ޕޮއިންޓާ އެކު އެވެ. މި ސީޒަންގެ ޗެެމްޕިއަންސް ލީގު ކުޅެމުން ދަނީ އަލަށް އެކުލަވާލި ފޯމެޓުގެ ދަށުންނެވެ. އެ ފޯމެޓުގައި އޮންނަ ގޮތުން، ލީގު ބުރުގެ ގަދަ އަށަކަަށް ދާ ޓީމުތަކަށް ގަދަ 16 އިން ޖާގަ ލިބޭނެ އެވެ. ގަދަ 16 ވަނަ ބުރުގެ ބާކީ އަށް ޖާގަ ލިބޭނީ، ތާވަލްގެ ނުވަ ވަނަ އާއި 24 ވަނައާ ދެމެދު އޮތް ޓީމުތަކުގެ މެދުގައި ކުޅޭ ޕްލޭ އޮފް މެޗުން މޮޅުވާ ޓީމުތަކަށެވެ.