ހައްޖާ އުމުރާގެ އަޅުކަމަށް މީހުން ގެންދިޔުމަށް ދިން ހުއްދަ ބާތިލްކުރުމުން، ޓްރެވެލް އެޖެންސީއަކަށް ނަން ބަދަލުކޮށްގެން ހުސްވި އަހަރުގެ ރަމަޟާން މަހު އުމުރާއަށް މީހުން ގެންދިޔަ އަލް މަޝްއަރު ޕްރައިވެޓް ލިމިޓެޑާއި އެ ކުންފުންޏާ ގުޅުން ހުރި އެހެން ކުންފުނިތަކަށް މަކަރާއި ހީލަތް ހަދައި ފައިސާ އަށް ހިޔާނާތްތެރިވެފައިވާ މައްސަލާގައި ދައުވާކުރުމަށް ފުލުހުން ޕްރޮސެކިއުޓާ ޖެނެރަލް (ޕީޖީ) އޮފީހަށް ފޮނުވައިފި އެވެ.
އުމުރާއަށް މީހުން ގެންދިޔަ ޓްރެވެލް އެޖެންޓަށް ފައިސާ ދައްކަން ދިން ޗެކުތަކެއް ބައުންސްވި މައްސަލާގައި މަޝްއަރު ގްރޫޕަށް ދައުވާކުރަން ހުސްވި ޑިސެމްބަރު މަހުގެ 2 ވަނަ ދުވަހު ޕީޖީ އަށް އޮތީ ފޮނުވާފަ އެވެ.
ފުލުހުންގެ މީޑީއާ އޮފިޝަލް ވިދާޅުވީ އެ ދައުވާގެ އިތުރަށް 27 މީހުންގެ އަތުން 500،000ރ އަށް ވުރެ ގިނަ ފައިސާ ނަގައި، މަކަރާއި ހީލަތް ހަދައި ފައިސާ އަށް ހިޔާނާތްތެރިވެފައިވާ މައްސަލައެއްގައި ދައުވާކުރުމަށް ހުސްވި ހަފްތާގެ އާދިއްތަ ދުވަހު ޕީޖީއަށް ފޮނުވާފައިވާ ކަމަށެވެ. އަދި މި މައްސަލައިގައި ދައުވާކުރަނީ މަސްއަރު ޕްރައިވެޓް ލިމިޓެޑްގެ ކުންފުނީގެ ވެރިޔާ ކ.މާލެ / މ. ހަވީރީފިނި ޢަލީ ފާރިޝް ގެ މައްޗަށްކަމަށެވެ.
އަދި މީގެ އިތުރުން އަލްމަޝްއަރު ޕްރައިވެޓް ލިމިޓެޑާއި ޓްރިއާ ޕްރައިވެޓް ލިމިޓެޑާއި ހާފްޓޯން މޯލްޑިވްސް ޕްރައިވެޓް ލިމިޓެޑް މައްޗަށް ވެސް ދައުވާކޮށް ދިނުމަށް އެދިފައިވާނެކަމަށް ފުލުހުންގެ މީޑިއާ އޮފިޝަލް ވިދާޅުވިއެވެ.
2024 ވަނަ އަހަރު އުމުރާ އަށް މީހުން ގެންދާނެކަމަށް ބުނެ އަލްމަޝްއަރް ޕްރައިވެޓް ލިމިޓެޑް އިން 27 މީހުންގެ އަތުން 500000 ރުފިޔާ އަށް ވުރެ ގިނަ ފައިސާ ނަގާ މަކަރާއި ޚީލަތް ހަދައި ފައިސާ އަށް ޚިޔާނާތްތެރިވެފައިވާ މައްސަލައެއްގައި ދައުވާކުރުމަށް 19 ޖަނަވަރީ 2025 ވަނަ ދުވަހު ޕްރޮސެކިއުޓަރ ޖެނަރަލް އޮފީހަށް ވަނީ ފޮނުވިފައި. މި މައްސަލައިގައި ދައުވާކުރަނީ މަސްއަރު ޕްރައިވެޓް ލިމިޓެޑްގެ ކުންފުނީގެ ވެރިޔާ ކ.މާލެ / މ. ހަވީރީފިނި ޢަލީ ފާރިޝް ގެ މައްޗަށް. މީގެ އިތުރުން އަލްމަޝްއަރު ޕްރައިވެޓް ލިމިޓެޑާއި ޓްރިއާ ޕްރައިވެޓް ލިމިޓެޑާއި ހާފްޓޯން މޯލްޑިވްސް ޕްރައިވެޓް ލިމިޓެޑް މައްޗަށް ވެސް ދައުވާކޮށް ދިނުމަށް އެދިފައިވާނެ.ފުލުހުންގެ މީޑިއާ އޮފިޝަލް
މި އަހަރު އުމްރާއަށް މީހުން ގެންގޮސް ހާލުގައި ޖެއްސި ހިޖުރަ ކުންފުނި، އިސްލާމިކް މިނިސްޓްރީން އެއް ލައްކަ ރުފިޔާއިން ޖޫރިމަނާކޮށްފައިވެ އެވެ. އެ ކުންފުންޏާ އޭގެ ހިއްސާދާރުން ހިމެނޭ އެހެން ކުންފުނިތަކަށް އުމްރާއަށް މީހުން ގެންދިއުމުގެ ހުއްދަ ނުދިނުމަށް މިނިސްޓްރީން ނިންމާފައިވެ އެވެ.
އޭގެ އިތުރުން އުމްރާއަށް މީހުން ގެންދިއުމުގެ އުސޫލާ ހިލާފުވެފައިވާތީ އެ ކަންކަމުގެ ކުޑަބޮޑު މިނަށް ބަލައި، 19 ކުންފުންޏެއް 5 ހާސް ރުފިޔާއިން ޖޫރިމަނާކުރި އެވެ. އެ ކުންފުނިތަކުގެ ނަމެއް އަދި މިހާތަނަށް ހާމަކޮށްފައެއް ނުވެ އެވެ.
އުމްރާއަށް މީހުން ގެންދިއުމަށް މިނިސްޓްރީން ދީފައިވާ ރަސްމީ ލައިސަންގެ ދައްކައިގެން އުމްރާއަށް ފުރަން ކަމަށް ހަދައި އެމްއެމްއޭ އިން ޑޮަލަރު ނަގައި، އުމްރާއަށް ނުދިޔަ ކުންފުންޏެއް މައްސަލަވެސް ލިބިފައިވާ ކަމަށްވެސް މިނިސްޓްރީން ބުންޏެވެ.
މިނިސްޓްރީން ބުނީ އިތުރަށް ބަލައި، އެކަން ސާބިތުވެއްޖެ ނަމަ އެކުންފުނި 30 ހާސް ރުފިޔާއިން ޖޫރިމަނާކޮށް ހުއްދަ ހިފަހައްޓާނެ ކަމަށެވެ.
